Learn Infraworks ,from scratch

هنبدأ نجهز للمشروع الخاص بنا ونعرف كيفية تجهيز واستدعاء الموديل داخل البرنامج وتحديد نظام الاحداثيات المتبع فى المشروع ونشرح الادوات الاساسية للتعامل مع الملفات داخل البرنامج.

كمان هنتعلم كيفية التحكم فى الطبقات والتنسيقات و الاستايلات الخاصة بالعناصر المختلفة داخل المشروع.

ومن هنا نبدأ مرحلة التصميم هنتعلم إزاى نقدر نصمم الطرق داخل البرنامج وإزاى نقدر نتحكم فى العناصر التصميمية للطريق زى البروفيل والسوبر ايليفيشن وكمان هنصمم تقاطعات بين الطرق ونعرف إزاى نقدر نضيف عناصر مختلفة للطرق زى اسهم الاتجاهات والعلامات الارضية للطريق.

ومنها هننتقل لمرحلة التعديل على الاستايلات الخاصة بالطرق وهنشوف سهولة تغيير نوع قطاع الطريق من حيث عدد الحارات وانواع التقاطعات وإزاى ان التغييرات دى بتتم بشكل مباشر وتقدر تشوف نتائجها بمجرد تغييرها.

منتعلم إزاى نصمم خطوط سكك حديدية داخل البرنامج وكيفية عمل حلول لمناطق تقاطعات السكك الحديدية مع الطرق سواء بإضافة جسور او انفاق أو حتى عمل تقاطع سطحى بينهم.

منتناول بعدها كل ما هو يخص العناصر الانشائية فى المشروع زى الكبارى والانفاق و حتى المبانى المحيطة بالمشروع وهنشوف إزاى بسهولة نقدر نغير بين انواع الانفاق أو انواع الجسور وإزاى نقدر نعدل مواصفات المبانى بكل بسهولة.

ننتقل بعدها الى الشبكات ونعرف ازاى نقدر نضيف عناصر مختلفة للشبكات زى العبارات الصندوقية الموجودة اسفل الطرق وكذلك ازاى نقدر نصمم شبكات تصريف مياة الامطار وإظهار كافه عناصرها وإزاى نقدر نعمل تحليل لسطح المشروع عشان نقدر نحدد أماكن تجمع المياة داخل المشروع.

بعدها هنبدأ نضيف عناصر طبيعية وصناعية على مخطط المشروع زى المبانى الخدمية والاشخاص والسيارات والاسوار وحتى الطيارات فى الجو كمان وهنشوف إزاى نقدر نضيف عناصر طبيعية زى الاشجار والبحيرات والمناطق الخضراء.

مننتقل بعدها لشرح القائمة الخاصة بعمليات التحليل لعناصر المشروع سواء تحليل للطرق نفسها من حيث اعداد تقارير للعناصر الطريق والمعايير المستخدمة فى التصميم وكميات الحفر والردم وتكلفة انشاء الطريق بناءا على الاسعار المدخلة إليه.

كذلك نقدر نعمل محاكاة لحركة المرور وكثافته على الطريق ويظهر لنا حركة السيارات بشكل فيديو وكذلك بشكل تقارير يمكن طبعتها.

كمان نقدر نعمل تحليل للمنشاءات الموجودة فى المشروع كالجسور و الانفاق و تحليل للشبكات الموجودة فى المخطط وعمل تقارير مفصلة لها.

هننتقل بعدها لشرح كيفية عمل الاخراج النهائى للمشروع بشكل صور عاليه الجودة وملفات فيديو توضح بالتفصيل كافة انحاء المشروع من خلال عمل مسارات لحركة الكاميرات وتحديد الفترات الزمنية للانتقال بينهم لإخراج فيديو تفصيلى للمشروع.

كمان هنوضح ازاى نقدر نعمل مشاركة لملفات العمل الخاصة بالانفراوركس وكيفية عمل ملفات للمشروع بعد تصميمه عشان نستخدمها فى برامج تانية زى السيفيل ترى دى او النافيس وركس.

وأخيراً هيكون فيه ورشه عمل لمشروعين مختلفين هنشوف من خلالهم إزاى اننا بسهولة نقدر ندمج بين السيفيل ترى دى والانفرا وازاى نقدر ندمج بين الريفيت وبين الانفرا بحيث نوضح سهولة اننا ننقل المشاريع الخاصة بين البرامج وبعضها.

بإذن الله بعد الكورس ده هيكون عندك المعرفة اللازمة و الاساسية لبرنامج الانفراوركس اللى من خلالها تقدر تتعمق أكتر واكتر فى مجال تقنية البيم لمشاريع البنية التحتية وتقدر تحسن من مستواك بشكل عام وتعطيك الافضلية فى سوق العمل العربى والعالمى.