مهارات التواصل

في الجزء الأول من الكورس هنعرف يعني إيه قاعدة الحذاء

ضع نفسك في حذاء الآخر غير ضع نفسك في مكان الآخر. لما بحط نفسي مكانك بقف جنبك علشان أشوف الموضوع من وجهة نظرك. أما ضع نفسك في حذاء الآخر فهي حالة من حالات التقمص تقدر بيها تفهم عواطف وطريقة تفكير اللي قدامك. يعني هدخل جوّاك وهفهم انت حاسس بإيه وشايف إيه وهعرف دماغك بتودّيك فين فأقدر أقنعك وأوصّل لك اللي أنا عايزه.

ولأن الكتاب هنا عن تغيير في السلوك وتقبل الآخرين عن طريق فهمهم فالكلام مش كفاية بقدر أهمية التطبيق. تعالوا نطبق مع بعض وبأسلوب كوميدي يثبت في الذهن وعمرنا ما ننساه.

في الجزء الثاني هنشوف مهارات الإنصات

لو عايز تبقى متحدث بارع لازم تكون مستمع بارع علشان تجمّع كل المعلومات اللي انت عايزها وبعدين الكلام يطلع من ناحيتك موزون ومقنع. فاكرين 80:20 Rule لاقوها بتنطبق على الإنصات والكلام. 80 بالمية من وقتك لازم تكون مستمع و20 بالمية بس تتكلم وهتخلّص اللي انت عايز تقوله لإنك هتتكلم صح وعارف انت هتتكلم في إيه ومش هتتكلم في إيه.

محدش كان متخيل إن احنا نقعد نتعلم إزاي نسكت. إنما احنا ممكن نشرح موضوع Active Listening ده في محاضرتين من كتر المهارات اللي موجودة عند الشخص السمّيع.

وهنعرف ليه قالوا الصمت لغة العظماء.

في الجزء الثالث هنتكلم عن مهارات الحديث والإقناع

المشكلة مش مشكلة انت بتقول إيه. ممكن تقول كلام زي الفل بس تقوله بأسلوب غلط فالناس تحدّفك بالطوب. وممكن تقول كلام زبالة بس تقوله بأسلوب محترم فالناس تعملك تماثيل. وده اللي بنقول عليه المعنى والأسلوب.