40 Derste Şer'iyye Sicilleri Eğitimi

Belgenin çevirisi;

Vech-i tahrîr-i sicil budur ki Karye-i Kadı’dan âmil olan Kosta b. Yani ve Hırsız Manol b. Toma meclis-i şer‘a hâzırân olduklarında mezbûr Kosta takrîr-i da‘vâ kılıp eyitti ki bana meclis-i şer‘de, bana “bre Yezid mel‘ûn” dedi, dedikde mezbûr Manol’dan su’âl olundukda mezbûr Kosta’dan alâ mâ deâhu beyyine taleb olunup Ali b. Mehmed ve Mustafa b. Mehmed nâm kimesneler biz şâhidleriz ve şehâdet ederiz mezbûr Âmil Kosta’ya mezkûr Manol, bre yezid mel‘ûn, deyû şetm etti dediklerinde ba‘de’t-tezkiyye hayyiz-i kabûlde vâki‘ olup bi’t-taleb kayd-ı defter olundu. Vaka‘a’t-tahrîr fî evâsıtı Cemâziyelevvel sene 957.

Şuhûdü’l-hâl: Hasan Çelebi b. Hızır, Papa Kosta b. Patrik, Yani b. Kosta.

Vech-i tahrîr-i sicil budur ki Karye-i Kadı’dan Ali b. Abdullah ve Mehmed b. İlyas meclis-i şer‘a hâzırân olduklarında mezbûr Ali takrîr-i da‘vâ kılıp eyitti ki gece benim bir atım boşanıb senin bağına girip siyâseten kuyruğun kesip dedikde mezbûr Mehmed’den su’âl olunup inkâr ile cevâb vericek mezbûr Ali’den beyyine taleb olunup beyyineden âciz olup mezbûr, Mehmed’e üç def‘a yemîn billâh teklîf olunup yemînden nükûl edip bi’t-taleb kayd-ı defter olundu. Vaka‘a’t-tahrîr fî evâsıtı Cemâziyelevvel sene 957.

Şuhûdü’l-hâl: Hasan b. Hızır Dede, Ahmed b. Nebi, Ali b. Mehmed, İskender b. Abdullah, Ali b. Hacı Fakih ve gayruhüm

Üveys / bey'-i bağ / Kerime

Mahmiyye-i Konya'da Seydi Dürri mahallesi sâkinlerinden Mehmed bin Receb nâm kimesne asâleten ve vâlidesi Kerime binti Pirkalem nâm hatun tarafından bey'-i âti'l-beyânı ve kabz-ı semeni ikrâra vekîl olup merkûmeyi ma'rifet-i şer'iyye ile ârifân olan Hüseyin Halife ibni Mustafa Beşe ve Ahmed bin Ali nâm kimesneler şehâdetleriyle şer'an vekâleti sâbite olan diğer oğlu Osman bin Receb nâm kimesne vekâleten meclis-i şer'-i hatîr-i lâzımü't-tevkîrde işbu râfi'ü'l -kitâb Uveys bin Pirkalem mahzarında her biri ikrâr ve takrîr-i kelâm edip mahmiye-i merkûme zeylinde Sahib Yakası mahallesinde vâkı' bir taraftan Ali mülkü ve bir taraftan nehr ve bir taraftan tarîk-i âmm ve bir taraftan çay ile mahdûd arz-ı hâliye ve eşcârı müştemil altı peşte mülk bağımızı mezbûr Uveys'e elli guruş ile meclis-i mübâya'ada mezi'a olan bir kabza fülûsa bey'-i bât-ı sahîh-i şer'î ile bey'ip ol dahi semen-i merkûm ile iştirâ ve kabûl eylemeğin meblağ-ı mezbûr elli guruşu ve bir kabza fülûsu bi't-tamâm mezbûr Üveys yedinden ahz u kabz eyleyip teslîm-i mebî' eyledik ba'de'l-yevm mülk-i müşterâdır keyfemâ-yeşâ' ve yahtâr zabt ve tasarruf eylesin dediklerinde gıbbe't-tasdîk mâ vaka'a bi't-taleb ketb olundu fi'l-yevmi'r-râbi' ve'l-işrîn min Zi'l-ka'de lisene hamse ve semânîn ve elf

Şaban Çelebi bin Mehmed / Abdullah bin Ali / Mustafa bin Receb / Diğer Şaban bin Abdülcelil / Ahmed bin Pirkalem / el-Hâcc Ali Beşe bin Mehmed

Vasî Mustafa Çelebi / isbât-ı hibe bağ ve menzil / Mehmed

Mahmiyye-i Konya’da İbni Salih mahallesi sâkinelerinden iken bundan akdem vefât eden Marziye binti Mustafa nâm hatunun ibn-i ammî ve hasren vârisi olan Mehmed bin Hüseyin nâm kimesne meclis-i şer‘-i hatîr-i lâzımü’t-tevkîrde mahmiyye-i mezbûrda Hacı Eymir mahallesi sükkânından Ayişe binti el-Hâcc Süleyman nâm sagîrenin kıbel-i şer‘den mansûb-ı vasîsi olup zikrleri atiyye menzil ve bağa bi’l-vesâye vâzı‘ü’l-yed olan Mustafa Çelebi bin Mehmed mahzarında üzerine da‘vâ ve takrîr-i kelâm idüp müteveffât-ı mezbûrenin ile’l-vefât mülkü olup Hâcı Eymir mahallesinde vâkı‘ bir tarafdan Ahmed mülkü ve bir tarafdan Mahmud mülkü ve bir tarafdan yar ve bir tarafdan tarîk-i âmm ile mahdûd bir tabhâne ve bir oda ve bir kilar ve bir örtme ve eşcâr ve havliyi müştemil menzil ve mahmiyye-i merkûme zeylinde iki çay arası dimeğle ma‘rûf mevzi‘de sahrınc kurbunda vâkı‘ bir tarafdan Mehmed mülkü ve bir tarafdan Börekcizâde tarlası ve bir tarafdan Tavacı Muharrem mülkü ve bir tarafdan tarîk-i âmm ile mahdûd bir örtme ve arz-ı hâliye ve eşcârı müştemil dört tahta bir kıt‘a bağ ba‘de vefâtihâ terekesinden olmağla bi’l-irsi’ş-şer‘î bana intikâl etmişiken vasî-i mezbûr Mustafa Çelebi ikisine dahi nâ-hakk vâz‘-ı yed eylemişdir ba‘de’s-suâl yed-i âriyesi kasr ve izâle olunup bana teslîm etdirilmesi matlûbumdur dedikde gıbbe’s-suâl vasî-i merkûm cevâbında fi’l-hakîka menzil-i mahdûd-ı mezbûr ile bağ-ı mezkûr müteveffât-ı merkûme Marziye’nin silk-i mülkünde münselik olduğu halde vasîsi olduğum karındaşı kızı sagîre-i mezbûreye hibe ve temlîk edip babası merkûm el-Hâcc Süleyman velâyeten kabz ve tesellüm etdikden sonra mezbûr el-Hâcc Süleyman kendi mâlından sagîre-i mezbûre için menzil-i mezbûrda olan oda ve tabhâneyi ta‘mîr ve tecdîd etdiğinden mâ‘adâ müceddeden bir oda dahi binâ edip ve bağ-ı mezbûrda dahi kezalik müceddeden bir örtme binâ etmişidi hâlâ menzil-i mezbûr ve bağ ve cümleten sagîre-i merkûmenin mülk-i mevhûbudur diyü def‘le mukâbele idicek gıbbe’l-istintâk ve’l-inkâr vasî-i mezbûrdan hibe-i meşrûhayı mübeyyin beyyine taleb olundukda udûl-i ahrâr-ı ricâl-i müslimînden Hacı Eymir mahallesinde sâkin Seyyid Mehmed Çelebi ibni Şeyh Bahşayiş Efendi ve Ahmed Çelebi bin Nasrullah nâm kimesneler li ecli’ş-şehâde meclis-i şer‘a hâzırân olup eserü’l-istişhâd fi’l-vâkı‘ mezbûre Marziye bizim huzûrumuzda hâl-i sıhhatinde zikr olunan menzil ve bağı mülkü olmağla ba‘de’t-tahliye sagîre-i mezkûre Ayişe’ye hibe-i sahîha-i şer‘iyye ile hibe ve temlîk ve babası mezbûr el-Hâcc Süleyman’a teslîm edip ol dahi bi’l-velâye mezbûre Ayişe için meclis-i hibede ittihâb ve kabz ve tesellüm edip ba‘dehu kendi mâlından sagîre-i mezbûr için menzil-i mezbûrda olan oda ve tabhâneyi ta‘mîr ve müceddeden bir izbe binâ etdiğinden mâ‘adâ bağ-ı merkûmda dahi müceddeden bir örtme binâ etmişdir biz bu husûsa şâhidleriz şehâdet dahi ederiz diyü edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a olmağın mezbûr Mehmed bî-vech mu‘ârazadan men‘ birle mâ vaka‘a bi’t-taleb ketb olundu fi’l-yevmi’s-sâlis ve’l-işrîn min Zi’l-ka‘deti’ş-şerîfe lisene hamse ve semânîn ve elf.

El-Hâcc Ahmed Çelebi bin Mustafa Bey / Mustafa Beşe bin İklimzâde / Çerkez Ahmed bin Hüseyin / Musa Halife el-imâm mahalle-i Arablar / Kemal Çelebi bin Receb / Musa bin Hüseyin

Saime / bey'-i menzil / Süleyman Halife

Mahmiyye-i Konya'da Seb'ahân mahallesi sâkinlerinden Süleyman Halife ibni Musa nâm kimesne meclis-i şer'-i hatîr-i lâzımü't-tevkîrde işbu râfi'ü'l-kitâb Saime binti Abdülgani nâm hatun mahzarında ikrâr-ı tâmm ve takrîr-i kelâm idüp mahalle-i mezbûrda vâkı' bir taraftan Ali mülkü ve bir taraftan Abdi Beşe mülkü ve bir taraftan bazen Cemile Hatun ve bazen Derviş Mehmed mülkleri ve bir taraftan tarîk-i has ile mahdûd bir oda ve bir tabhâne ve bir kilar ve bir mikdar havliyi müştemil mülk menzilimi mezbûre Saime'ye on iki esedî guruş ve otuz iki akçeye bey'-i bât-ı sahîh-i şer'î ile bey'ip ol dahi semen-i merkûm ile iştirâ ve kabûl eylemeğin meblağ-ı mezbûrı bi't-tamâm mezkûre Saime yedinden ahz u kabz eyleyüp teslîm-i mebî' eyledim ba'de'l-yevm mülk-i müşterâsıdır keyfemâ-yeşâ' ve yahtâr zabt ve tasarruf eylesin dedikde gıbbe't-tasdîk mâ vaka'a bi't-taleb ketb olundu fi'l-yevmi's-sâbi' min Zi'l-ka'deti'ş-şerîfe lisene hamse ve semânîn ve elf.

Mehmed Halife bin İsa Hâce / el-Hâcc Mehmed bin Receb / Mehmed bin Ahmed / Hasan Çelebi bin Sıddık / Mustafa Çelebi bin el-Hâcc Mehmed

Halil / bey‘ / Ebubekir

Mahmiyye-i Konya’da Dolabucu mahallesi sâkinlerinden Ebubekir bin Mehmed nâm kimesne meclis-i şer‘-i hatîr-i lâzımü’t-tevkîrde işbu râfi‘ü’l-kitâb Halil bin Abdülkerim mahzarında ikrâr ve takrîr-i kelâm edip mahalle-i mezbûrede vâkı‘ bir tarafdan Sadık Dede mülkü ve bir tarafdan Mehmed mülkü ve bir tarafdan Osman mülkü ve bir tarafdan tarîk-i âmm ile mahdûd bir tabhâne ve bir örtme ve bir oda ve havliyi müştemil mülk menzilimi mezbûr Halil’e mahalle-i merkûmede vâkı‘ bir tarafdan Ebubekir mülkü ve tarafeynden Ahmed mülkü ve bir tarafdan tarîk-i âmm ile mahdûd bir tabhâne ve bir fevkânî oda ve bir ahur ve bir samanlık ve bir örtme ve havliyi müştemil mülk menzili ile sekiz esedî guruşa bi-tarîki’l-mübâdele ve’l-mukâyasa bey‘-i bât-ı sahîh-i şer‘î ile bey‘ edip ol dahi semen-i merkûm ile iştirâ ve kabûl eylemeğin mezbûr Halil’in hudûd-ı merkûme ile mahdûd menzilini ve yedinden sekiz esedî guruşu bi’t-tamâm ahz u kabz eyleyip teslîm-i mebî‘ eyledim ba‘de’l-yevm mezbûr Halil’in menzil-i mahdûd-ı merkûmu benim mülküm olup benim menzil-i mahdûdum mezkûr Halil’in mülk-i müşterâsıdır keyfemâ-yeşâ’ ve yahtâr zabt ve tasarruf eylesin dedikde gıbbe’t-tasdîk mâ vaka‘a bi’t-taleb ketb olundu fi’l-yevmi’s-sânî ve’l-işrîn min Zi’l-ka‘deti’ş-şerîfe lisene hamse ve semânîn ve elf.

Abdülkerim Halife bin el-Hâcc Mehmed / Himmet Halife bin Mustafa / Receb bin Himmet / Rumi bin Himmet / Osman bin Hüseyin / Mustafa bin Mahmud

Murad Bey / bey'-i tarla / Ayşe ve Emine

Mahmiyye-i Konya'da Kurugöl mahallesi sakinlerinden Ayişe ve Emine ibneti Ali nâm hatunlar meclis-i şer'-i hatîr-i lâzımü't-tevkîrde işbu râfi'ü'l-kitâb Murad Bey ibni Hızır nâm kimesne mahzarında her biri ikrâr- ı tâmm ve takrîr-i kelâm edip mahmiyye-i merkûme zeylinde Kovanağzı nâm mevzi'de vâkı' tarafıneyninden mezbûr Murad Bey mülkü ve bir taraftan Seyyid İsmail Çelebi mülkü ve bir taraftan Emirkızı mülkü ile mahdûd bir emrud ağacı ve bir harâbe ev yeri müştemil üç dönüm tarlamızı mezbûr Murad Bey'e nakd-i râyic-i fi'l-vakt üç bin üç yüz akçeye bey'-i bât-ı sahîh-i şer'î ile bey' edip ol dahi semen-i merkûm ile iştirâ ve kabûl eylemeğin meblağ-ı mezbûrı bi't-tamâm mezkûr Murad yedinden ahz u kabz eyüp teslîm-i mebî' eyledim ba'de'l-yevm mülk-i müşterâsıdır keyfemâ-yeşâ' ve yahtâr zabt ve tasarruf eylesin dediklerinde gıbbe't-tasdîk mâ vaka'a bi't-taleb ketb olundu fi'l-yevmi'r-râbi' ve'l-işrîn min Zi'l-ka'deti'ş-şerîfe lisene hamse ve semânîn ve elf.

Salih Bey bin Ahmed / Murad bin Muharrem / Receb bin Süleyman / el-Hâcc Pircivan bin Fethullah / Sefer bin Hızır

Vasî Mustafa / Sagîre Ayise

Mahmiyye-i Konya'da el-Hâcc Eymir mahallesi sakinlerinden iken bundan akdem fevt olan el-Hâcc Süleyman bin Mustafa nâm kimesnenin sulbiye sagîre kızı Ayişe'ye babası müteveffâ-yı mezbûrun muhallefâtından irs-i şer'î ile intikâl eden emvâl ve erzâkını zabt ve hıfza vesâir vâkı' olan umûr-ı şer'iyyesini tesviyeye bir vasî lâzım ve mühim olmağla dayısı râfi'-u hâze'l-kitâb Mustafa Çelebi ibni Mehmed nâm kimesne mukaddem ve müstakîm olmağla savb-ı şer'den vasî nasb ve ta' yîn olundukda ol dahi vesâyet-i merkûmeyi kabûl ve hıdmet-i lâzımesini edâya ta'ahhüd ve iltizâm etmeğin mâ vaka'a bi't-taleb ketb olundu fi'l-yevmi's-sâlis ve'l-işrîn min Zi'l-ka 'deti'ş-şerîfe lisene hamse ve semânîn ve elf.

Fahru'l-kuzât Ahmed Efendi bin Durmuş Beşe / Fahrü'l-hutebâ Abdülkadir Efendi bin Mahmud Efendi / el-Hâcc Ahmed Çelebi bin Mustafa Bey

El-Hâcc İsmail / Hibe-i arsa / Safayîzâde

Mahmiyye-i Konya’da Hoşhân mahallesi sâkinlerinden Safayîzâde Mehmed Ağa nâm kimesne meclis-i şer‘-i hatîr-i lâzımü’t-tevkîrde işbu râfi‘ü’l-kitâb el-Hâcc İsmail bin Ahmed mahzarında ikrâr-ı tâmm ve takrîr-i kelâm edip Akıncı mahallesi kurbunda vâkı‘ bir tarafdan merhûm Akıncı Sultan divarı köşesinden topçu divarına ve bir tarafdan mahalle-i mezbûre mescidi divarı köşesinden Davud Beşe mülküne ve bir tarafdan eski saraya ve bir tarafdan tarîk-i âmma hudûdu müntehiye olan bir mikdar arsa-i hâliye mukaddemâ ahar kimesnenin vakfı ve mülkü olmamağla bin seksen senesinde hazîne-i Karaman defterdârı olan refî‘ü’l-kadr ve azîmü’ş-şân izzetlü ve sa‘âdetlü Ali Paşa hazretleri taraf-ı âlîlerinden bana bey‘ ve teslîm ve mîrî için yedimden kabz-ı semen olunmağla yedime mümzâ ve mahtûm temessük alıp mülk-i müşterâm olmuşidi hâlâ hudûd-ı merkûme ile mahdûde olan arsa-i mezbûreyi fârigatü ani’ş-şevâgil hâliyeten ani’l-mevâni‘ mezbûre el-Hâcc İsmail’e hibe-i sahîha-i şer‘iyye ile hibe ve temlîk ve teslîm eyledim ol dahi meclis-i hibede ittihâb ve kabz ve tesellüm edip mülk-i mevhûbudur keyfemâ-yeşâ’ ve yahtâr ba‘de’l-yevm zabt ve tasarruf eylesin dedikde gıbbe’t-tasdîk mâ vaka‘a bi’t-taleb ketb olundu fi’l-yevmi’s-sâbi‘ aşer min Zi’l-ka‘deti’ş-şerîfe lisene hamse ve semânîn ve elf.

Fahru’l-kuzât el-Hâcc Ömer Efendi bin el-merhûm Abdülgani Efendi / İsmail Çelebi bin Süleyman / el-Hâcc Osman bin Hüseyin / el-Hâcc Mustafa bin el-Hâcc Pir Ali / el-Hâcc Abdi bin el-Hâcc Ahmed

Mahmiyye-i Konya’da Ahmed Fakıh mahallesi sâkinelerinden İsmihan binti Çalabvirdi nâm hatun tarafından husûs-ı âti’l-beyânı ikrâra vekîl olup merkûmeyi ma‘rifet-i şer‘iyye ile ârifân olan fahrü’l-akrân Serdar Hasan Beşe ibni Mustafa ve Osman Çelebi ibni Ahmed şehâdetleriyle şer‘an vekâleti sâbite olan sadrı kebîr oğlu Halil bin (boşluk) nâm kimesne vekâleten meclis-i şer‘-i hatîr-i lâzımü’t-tevkîrde işbu râfi‘ü’l-kitâb Ahmed bin Mehmed ve Eşmi binti (boşluk) nâm hatun tarafından tasdîk-i câî-i yed vekîl-i şer‘îsi olan sadrı oğlu Osman bin Abdi mahzarlarında ikrâr ve takrîr-i kelâm idüp mahalle-i merkûmede vâkı‘ bir tarafdan Ahmed Ağa mülkü ve bir tarafdan Ali Ağa mülkü ve bir tarafdan Ahi Tarîk vakfı ve bir tarafdan tarîk-i âmm ile mahdûd bir oda ve bir tabhâne ve bir ahur ve bir kilar ve havliyi müştemil menzilin sülüs-i şâyi‘i sâbıkâ müvekkilem merkûme İsmihan’ın vâlidesi Fati Hatun’un mülkü olup tarih-i kitâbdan elli sene mukaddem mezbûre Fati fevt oldukda vâlidem İsmihan sadriye kızı ve hasren vârisesi olup menzil-i merkûmun sülüs-i şâyi‘i irs-i şer‘î ile merkûme İsmihan’a intikâl edip mülk-i mevrûsu olmuşiken hâlâ mezbûrân Ahmed ve Eşmi menzil-i mahdûd-ı merkûmun sülüsânına mâlik olmalarıyla vâlidemin hissesi olan sülüs-i şâyi‘i ile ma‘an hudûd-ı merkûme dâhilinde olan menzil-i mezbûrun cemî‘sini kendi mülkleri olmak üzre âhara bey‘ ve teslîm murâd edip vâlidem mezbûre İsmihan sülüs-i merkûmu da‘vâ edip ânlar dahi inkâr etmeleriyle mezbûre İsmihan beyyine ile isbât sadedinde iken bi-tavassuti’l-müslimîn alâ tarîkü’s-sulh müvekkilem merkûme da‘vâ-yı meşrûhası mukâbelesinde mezbûrân Ahmed ve Eşmi yedlerinden hudûd-ı merkûme dâhilinde vâkı‘ sâlifü’z-zikr bir tabhâne ve mikdârı beynimizde ma‘lûm havliyi alup kabûl ve kabz edip zikr olunan sülüs-i şâyi‘a müte‘allik da‘vâ ve nizâ‘dan mezbûrân Ahmed ve Eşmi’nin zimmetlerini ibrâ-i âmm ile ibrâ ve iskât eyledi min ba‘d bu husûsa müte‘allik benden bi’l-vekâle ve bi’l-asâle da‘vâ ve husûmet sudûr eder ise lede’l-hükkâmi’l-kirâm mesmû‘a ve makbûle olmaya didi dedikde gıbbe’t-tasdîk mâ vaka‘a bi’t-taleb ketb olundu fi’l-yevmi’l-hâmis aşer min Zi’l-ka‘deti’ş-şerîfe lisene hamse ve semânîn ve elf.

El-Hâcc İsa Halife Şücazâde / Ali Halife bin Hüseyin / Budak bin Ali / el-Hâcc Nurullah bin Receb / Abdurrahman bin Ali / Hüseyin bin Bali

Mahmiyye-i Konya’da civâr-ı Hazret-i Mevlana kuddise sırruh mahallesi sâkinlerinden bundan akdem vefât eden Süleyman ibni el-Hâcc Memi nâm kimesnenin sulbî sagîr oğulları Halil ve İbrahim babaları müteveffâ-yı mezbûrun muhallefâtından irs-i şer‘î ile intikâl eden emvâl ve erzâkı zabt ve hıfza vesâir vâkı‘ olan umûr-ı şer‘iyyelerini görüvermeye bir vasî lâzım ve mühimm olmağın hâkim-i mevki‘ü’l-kitâb tûbâ lehu ve hüsn-i meâb dahi halaları râfi‘atü’l-kitâb Ayişe ibneti el-Hâcc Memi nâm hatun mukaddime ve müstakîme olmağla vasî nasb ve ta‘yîn eyledikde ol dahi vesâyet-i merkûmeyi kabûl ve hıdmet-i lâzımesini edâya ta‘ahhüd ve iltizâm etmeğin mâ vaka‘a bi’t-taleb ketb olundu fi’l-yevmi’l-hâdî aşer min Zi’l-ka‘de lisene hamse ve semânîn ve elf.

Seyyid Abdüllatif Çelebi bin Derviş Süleyman / Mehmed Halife bin İsmail Halife / Musa Çelebi bin el-Hâcc Ömer / Yunus bin Mevlüd

Sâbıkâ Kudüs-i şerîf beğlerbeğisi olan izzetlü ve sa‘âdetlü Hürmüş Paşa hazretlerinin karındaşı olan fahrü’l-emâsil ve’l-akrân Asaf Bey tarafından husûs-ı âti’z-zikre vekâlet iddi‘â eden İbrahim Bey ibni Abdullah meclis-i şer‘-i hatîr-i lâzımü’t-tevkîrde işbu Seyyid Mehmed Çelebi ibni Mustafa mahzarında üzerine da‘vâ ve takrîr-i kelâm edip müvekkileiim mezbûr Asaf Bey mezkûr Seyyid Mehmed Çelebi yedinden elli esedî guruş nakd istikrâz ve kabz ve istihlâk ve otuz guruşluk kahve ve prinç iştirâ edip cem‘an seksen guruş deyni oldukdan sonra mukâbelesinde üç sim kemer raht ve iki sim saat ve bir sim kılıç ve bir sim buhurdan ve bir sim gülabdan mezbûr Seyyid Mehmed Çelebi’ye rehn vermişdi hâlâ ahar diyârda olmağla deyn-i mevkûfı mezbûr Seyyid Mehmed Çelebi’ye edâya ve rehn olan eşyâ-i merkûmeyi ahz u kabza tarafından beni vekîl nasb edip mümzâ ve mahtûm temessük irsâl etmeğle eşyâ-i mezbûreyi taleb ederin suâl olunsun dedikde gıbbe’s-suâl mezbûr Seyyid Mehmed Çelebi cevâbında vech-i muharrer üzre seksen guruş deyn mukâbelesinde eşyâ-i mezbûreyi rehn aldığını ikrâr edip vekâlet-i meşrûhayı inkâr idicek mezbûr İbrahim Bey’den vekâlet-i merkûmeyi mübeyyin beyyine taleb olundukda udûl-i müslimînden Ramazan Bey ibni el-Hâcc Allahverdi ve Mehmed Bey ibni Süleyman nâm kimesneler li ecli’ş-şehâde meclis-i şer‘a hâzırân olup eserü’l-istişhâd fi’l-vâkı‘ mezbûr Asaf Bey bizim huzûrumuzda mezkûr Seyyid Mehmed Çelebi’ye deyni olan seksen esedî guruşu edâya ve mukâbelesinde rehn olan üç sim kemer raht ve iki sim saat ve bir simli kılıç ve bir sim buhurdan ve bir sim gülabdanı yedinden ahz u kabza mezkûr İbrahim Bey’i vekîl edip ol dahi vekâlet-i mezbûreyi kabûl eyledi biz bu husûsa şâhidleriz şehâdet dahi ederiz diyü edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a olmağın rehn olan eşyâ-i merkûmeyi ba‘de edâü’d-deyn vekîl-i mezbûr İbrahim Bey’e teslîme merkûm Seyyid Mehmed Çelebi’ye tenbîhden sonra mezbûr İbrahim Bey meblağ-ı mezbûr seksen guruşu merkûm Seyyid Mehmed Çelebi’ye edâ ve teslîm edip yedinden eşyâ-i merkûmeyi bi’t-tamâm ahz u kabz eyledim diyü tav‘an ikrâr ve i‘tirâf etmeğin mâ vaka‘a bi’t-taleb ketb olundu fi’l-yevmi’s-sânî aşer min Zi’l-ka‘deti’ş-şerîfe lisene hamse ve semânîn ve elf.

El-Hâcc Mahmud bin Mustafa / Seyyid Mehmed Çelebi bin Seyyid Salih Çelebi / Ömer Çelebi bin Abdurrahman / Kemal Çelebi bin el-Hâcc Ali / Ali Beşe bin Ahmed Beşe

Mahmiyye-i Konya’da Abdülaziz mahallesi sâkinelerinden Ziynet binti Ahmed nâm hatun tarafından bey‘-i âti’l-beyânı ve kabz-ı semeni ikrâra vekîli olup merkûmeyi ma‘rifet-i şer‘iyye ile ârifân olan el-Hâcc Ali bin Hasan ve Seyyid Receb Çelebi ibni Seyyid Abdi şehâdetleriyle şer‘an vekâleti sâbite olan Abdi Halife ibni Ahmed Halife meclis-i şer‘-i hatîr-i lâzımü’t-tevkîrde işbu râfi‘ü’l-kitâb Muharrem bin İbrahim mahzarında bi’l-vekâle ikrâr ve takrîr-i kelâm idüp müvekkilem merkûme Ziynet’e mahmiyye-i merkûme zeylinde Şeyh vefa mahallesi kurbunda vâkı‘ kıbleten mezbûr Muharrem mülkü ve şarken bazen Seyyid Carullah ve bazen İbrahim Halife mülkleri ve garben Serraczâde Efendi mülkü ve şimâlen tarîk-i âmm ile mahdûd bir tabhâne ve bir ahur ve bir örtme ve arz-ı hâliye ve eşcârı müştemil beher sene merhûm Şeyh Sadreddin kuddise sırruh vakfına Ziynet’in on üç akçe icâresi olup mefrûşât ve ebniye ve sukûfu mülkü olan bir kıt‘a bağını mezkûr Muharrem’e kırk yedi esedî guruşa bey‘-i bât-ı sahîh-i şer‘î ile bey‘ idüp ol dahi semen-i merkûm ile iştirâ ve kabûl eylemeğin meblağ-ı mezbûr kırk yedi guruşu merkûm Muharrem yedinden bi’t-tamâm ahz u kabz eyleyüp teslîm-i mebî‘ eyledim ba‘de’l-yevm mülk-i müşterâsıdır keyfemâ-yeşâ’ ve yahtâr zabt ve tasarruf eylesin dedi dedikde gıbbe’t-tasdîk mâ vaka‘a bi’t-taleb ketb olundu fi’l-yevmi’t-tâsi‘ aşer min Zi’l-ka‘deti’ş-şerîfe lisene hamse ve semânîn ve elf.

Hasan Halife bin Nebi Halife / Seyyid Hasan Çelebi bin Seyyid Ömer / el-Hâcc Ahmed bin Yusuf / Şaban bin Mehmed / Mehmed bin el-Hâcc Seydi / Mustafa bin Ahmed

Mahmiyye-i Konya’da medîne-i Celaliye mahallesi sâkinelerinden Ünzile binti Halil nâm hatun meclis-i şer‘-i hatîr-i lâzımü’t-tevkîrde zevci râfi‘ü’l-kitâb İvaz nâm kimesne tarafından husûs-ı âti’z-zikre vekîli olan babası el-Hâcc Mehmed bin Osman mahzarında ikrâr ve takrîr-i kelâm idüp zevcim mezbûr İvaz ile mâbeynimiz hüsn-i zindegânî ve musâfât olmamağla zimmetinde mütekarrer ve ma‘kûdun aleyh olan mihr-i müeccelimden ve me’ûnet-i süknâmdan ferâgat ve nafaka-i iddet-i ma‘lûmem kendi üzerime olmak üzre zimmetini ibrâ ve iskât edip ve kendi eşyâmı ahz u kabz edip ve hukûk-ı zevciyemden kat‘-ı alâka eyledim min ba‘d bir akçe ve bir habbe hakk ve alâkam kalmamağla vekîl-i mezbûr el-Hâcc Mehmed dahi merkûme Ünzile’yi cemî‘ kelimât-ı meşrûhasında tasdîk edip bi’l-vekâle mezbûreyi muhâla‘a eyledim min ba‘d iddeti münkaziye oldukda nefsi dilediği kimesneye tezevvüc eylesin dimeğin mâ vaka‘a bi’t-taleb ketb olundu fi’l-yevmi’t-tâsi‘ aşer min Zi’l-ka‘de lisene hamse ve semânîn ve elf.

Serrac Çerkez Yusuf bin İbrahim / Receb bin Veli an mahalle-i Medrese / Mahmud bin Şaban / Mehmed Dede bin Hasan

El-Hâcc Mehmed / nizâ‘-ı menzil / Ayişe

Mahmiyye-i Konya’da Debbağhâne mahallesi sâkinlerinden iken bundan akdem fevt olan Köse Muharrem bin Hüseyin nâm kimesnenin verâseti zevce-i metrûkesi Fatıma binti Nebi nâm hatun ile sulbiye kızları Ayişe ve Ayni ve Ümmi’ye münhasıra olduğu şer‘an mütehakkık oldukdan sonra mezbûre Ayişe meclis-i şer‘-i hatîr-i lâzımü’t-tevkîrde zikri âtî olan debbağ dükkanına mülkiyet üzre vâzı‘ü’l-yed olan işbu râfi‘ü’l-kitâb el-Hâcc Mehmed bin el-Hâcc Halil mahzarında üzerine da‘vâ ve takrîr-i kelâm edip mahmiyye-i merkûmede debbâğhânede vâkı‘ hudûdu beynimizde ma‘lûm bir bâb debbâğ dükkânı babam müteveffâ-yı mezbûrun muhallefâtından olup yirmi dört sehmden yedi sehmi bi’l-irsi’ş-şer‘î bana intikâl etmişiken cemî‘ dükkân-ı merkûmdan benim hisse-i meşrûhama mezbûr el-Hâcc Mehmed nâ-hakk vaz‘-ı yed eylemişdir suâl olunup yed-i âriyesi hissemden kasr ve izâle olunması matlûbumdur dedikde gıbbe’s-suâl mezbûr el-Hâcc Mehmed cevâbında dükkân-ı mezbûrı ve kurbunda vâkı‘ beynimizde hudûdu ma‘lûm mülk menzili müştemilâtıyla bin yetmiş dört senesi mâh-ı Şevvâlinin yedinci günü esedî guruş yüzer akçeye râyic iken yetmiş guruş hesâbı üzre yedi bin akçeye merkûme Ayişe’nin kız karındaşı mezbûre Ayni safka-i vâhide ile babam el-Hâcc Halil’e bâten bey‘ ve teslîm edip babam mezbûr el-Hâcc Halil dahi ba‘de’l-iştirâ ve’t-tesellüm hüccet-i şer‘iyye dahi olunmuşiken mâh-ı mezbûrun on birinci günü mezbûre Ayişe dahi dükkân-ı merkûmı ve menzil-i mezbûrı hemşirem Ayni mülki olduğu halde işbu el-Hâcc Halil’e bâten bey‘ ve teslîm eylemişdir dükkân-ı mezbûrda alakam yokdur diyü sinni ve cüssesinin bülûğa tahammülü olduğu hâlde meclis-i şer‘de tarih-i mezbûrda hilâfeten müvellâ olan mevlânâ Ahmed Efendi huzûrunda tav‘an i‘tirâf ve hüccet-i şer‘iyye olunmağla dükkân-ı mezbûr müstakıllen babamın mülk-i müşterâsı olup vefât etmeğle irsen bana intikâl etmişdir diyü def‘le mukâbele ve tarih-i mezbûrda hilâfeten müvellâ olan mevlânâ Ahmed Efendi imzâsıyla mümzâ ve hatmi ile mahtûme ve mazmûnı takrîr-i meşrûhuna muvâfık hüccet-i şer‘iyye ibrâz edip ba‘de’l-feth muvâcehesinde kırâat ve istintâk olundukda cevâbında vech-i meşrûh üzre mevlânâ-yı mezbûr huzûrunda i‘tirâfına ikrâr velakin hîn-i ikrârda sinn ve cüssesinin bülûğa tahammülü olmayıp ve bülûğa i‘tirâfını inkâr idicek mezbûr el-Hâcc Mehmed’den müdde‘iyye-i merkûmenin tarih-i mezkûrda mevlânâ-yı mûmâ ileyh huzûruna geldikde sinni ve cüssesinin bülûğa tahammülü olduğuna ve bülûğuna i‘tirâfına beyyine taleb olundukda udûl-i ahrâr-ı ricâl-i müslimînden el-Hâcc İvaz bin el-Hâcc Mehmed ve el-Hâcc Mevlüd bin el-Hâcc Mehmed nâm kimesneler li ecli’ş-şehâde meclis-i şer‘a hâzırân olup eserü’l-istişhâd fi’l-vâkı‘ tarih-i mezbûrda mevlânâ-yı mûmâ ileyh huzûrunda sinn ve cüssesinin bülûğa tahammülü olduğu hâlde bizim huzûrumuzda bülûğuna ba‘de’l-i‘tirâf hâlâ hisse taleb etdiği debbağhânede alaka ve hakkım yokdur diyü i‘tirâf etmişdir biz bu husûsa şâhidleriz şehâdet dahi ederiz diyü edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a olmağın mezbûre Ayişe mücerredce mu‘âraza men‘ birle mâ vaka‘a bi’t-taleb ketb olundu fi’l-yevmi’s-sâmin aşer min Zi’l-ka‘deti’ş-şerîfe lisene hamse ve semânîn ve elf.

El-Hâcc Süleyman bin Abdi Beşe / el-Hâcc İbrahim bin Hamza / el-Hâcc İdris bin el-Hâcc İsmail / el-Hâcc Mehmed bin el-Hâcc Şaban

Sûret

Mahmiyye-i Konya’da Ahmed Fakıh mahallesi sâkinlerinden râfi‘-i hâze’l-kitâb Mehmed bin Mahmud nâm kimesne meclis-i şer‘-i hatîr-i lâzımü’t-tevkîrde işbu Emine binti Mehmed mahzarında üzerine da‘vâ ve takrîr-i kelâm edip mukaddemâ bir husûs için ben Kethudâyeri Mehmed Ağa’nın habsinde iken hâzırân-ı bi’l-meclis eniştem Ömer Beşe’nin zevcesi ve kız karındaşım Raziye nâm kimesneler benim için merkûme Emine yedinden beher vukıyyesi birer guruşa olmak üzre yirmi üç vukıyye kahve iştirâ etdi diyüp semeni olan meblağ-ı mezbûr mukâbelesinde benim tarafımdan bir yeşil frengi atlas kaftan ve yirmi dokuz paftalı bir sim kitabe kuşak ve bir beledî müsta‘mel mâî döşek ve bir yüz yasdığı ve bir yan kaliçesi ve bir orta zilesi ve bir kilim ve bir çorba sahanı ve bir sini ve tahmînen altı buçuk vukıyye bir kazgan ve yedi sahan ve iki tenceremi rehn verip teslîm edip ol dahi ahz u kabz etmişidi hâlâ meblağ-ı mezbûr yirmi üç guruşu tedârik ve ihzâr eyledim eşyâ-i merkûmeyi taleb ederin suâl olunup alıverilmesi matlûbumdur dedikde gıbbe’s-suâl mezbûre Emine cevâbında mezbûr Mehmed için merkûmân Ömer Beşe’nin zevcesi ve merkûme Razıye yedlerine yirmi beş guruş virüp mukâbelesinde eşyâ-i mezbûreyi rehn aldım diyüp zikr olunan eşyâdan bir yan kaliçesi ve bir kilim ve bir siniyi meclis-i şer‘de merkûm Mehmed’e teslîm ve ol dahi kabz edip mezkûre Emine eşyâ-i merkûmenin sâirini mezbûr Mehmed’in karındaşı İsmail ma‘rifetiyle bey‘ eyledim diyücek bey‘ olan eşyâ-i merkûmenin kıymetlerini ba‘de’s-sübût deyn-i mezbûra mahsûb etmeğin merkûme Emine’ye tenbîh ve yirmi üç guruşdan ziyâde iki guruşunu beyyine ile isbâta imhâl birle mâ vaka‘a bi’t-taleb ketb olundu fi’l-yevmi’s-sâdis aşer min Zi’l-ka‘de lisene hamse ve semânîn ve elf.

Sinan Bey bin Bostan Bey / Ali Bey bin Bostan Bey / Ahmed bin Mehmed

Bu hüccet sehvle tahrîr olmağla tekrâr tashîh olunup yirmi ikinci sahîfede kayd olundu.

Ermeni keferesinin mezarlığını keşf hüccetidir

Suret

Mahmiyye-i Konya’da sâkin Ermeni keferesinin papasları olan Ohan Keşiş veledi Ohan ve Nevros Keşiş veledi Karabet ve Arakil veledi Makir ve Haçatur Keşiş veledi Nikagos ve Serkiz Keşiş veledi Arazman ve tâife-i merkûmeden Serkiz veledi Zeki ve Satı veledi Bayındır ve Satılmış veledi Murat ve Nikagos veledi Şirvan ve diğer Serkiz veledi Kesber ve Bedros veledi Nikagos ve Şirvan veledi Karaoğlan ve Bedros veledi Murat nâm zimmîler meclis-i şer‘de takrîr-i kelâm idüp hâric-i sur mahmiyye-i mezbûrede Meram’a mürûr eden tarîk-i âmm üzerinde paşa çeşmesi mukâbelesinde vâkı‘ olup mürdelerimizi idhâl edegeldiğimizde iki dönüm mikdârı arsa yüz seneden mukaddem Memi Bey nâm kimesnenin mülk-i mahzı ve hakk-ı sırfı olmağla mahmiyye-i mezbûre ahalisinden Karagöz veledi Davud nâm zimmîye beş esedî guruşa bey‘ ve teslîm edip ol dahi ba‘de’l-iştirâ ve’t-tesellüm mevtâ-yı ermeniyanı idhâle vakf edip tescîl-i şer‘î ve teslîm-i mütevellî etmeğle tarih-i kitâbdan üç sene mukaddem gelince bi emrillâhi te‘âlâ mürd olanlarımızı arsa-i mezbûreye idhâl edegelip âhardan müdâhale ve mu‘âraza edegelinmiş değil iken üç sene mukaddem mahmiyye-i mezbûrede mîr-âb olan Bektaş Bey nâm kimesne arsa-i mezbûre arazi-i öşriyyeden olduğuna yedinde sûret defteri yoğiken kavl-i mücerredi ile gâh arsa-i mezbûre için arazi-i öşrüyedendir vakfı sahîh değildir diyüp ve gâh sizin mürdenize mahsûs olan mahal bir dönümdür hâlâ etrafından birkaç dönüm arsayı dahi fuzûlî mezarlığınıza zamm ve ilhâk etdiniz diyü bizi ta‘cîz ve tazyîk etmeğle hilâf-ı şer‘-i şerîf ma‘lûmu’l-mikdâr akçemiz almağın mezbûrdan sonra her kim mîr-âb olursa arsa-i mezbûre için iki dönümden ziyâdedir diyü bizi ta‘cîz ve tazyîkden hâlî değillerdir savb-ı şer‘den üzerine varılıp mezarlık ittihâz etdiğimiz arsanın tûl ve arzı mesâha olunmasın taleb ederiz dediklerinde cânib-i şer‘den mevlânâ Abdülkadir Efendi ibni Mahmud Efendi irsâl olunup ol dahi mahmiyye-i mezbûrede berât-ı âlî ile çiftçiler şeyhi olup mesâha-i arazi-i mahmiyye-i merkûmeye vukûfu olan es-Seyyid Ahmed Çelebi ibni Mahmud ve zeyl-i hüccetde mastûrü’l-esâmî olan müslimîn ile arsa-i mezbûrenin üzerine varup tarlada dönüm şeyhü’l-islâm Haherzâde ihtiyâr etdiği üzre her diyarın ehli beyninde ma‘rûf olan mikdâr olup ve mahmiyye-i mezbûre ahalisi beynlerinde ma‘rûf olan her bir dönüm insan adımı ile otuz iki adım tûlı ve otuz iki adım arzı olmak üzre olduğu müte‘ayyin ve mütehakkık olduğu ecilden mevlânâ-yı mezbûr şeyh-i merkûme arsa-i mezbûreyi diyârlarında ma‘rûf olduğu üzre mesâhaya emr etdikde ol dahi arsa-i mezbûreyi mesâha idüp tûlen elli iki adım ve arzen otuz altı adım olup ber vech-i tahmîn iki dönüme karîb olduğunu ve civârında mekâbir-i müslimîn olmayıp etrâf-ı selasesinde kadîmî taş divar olduğunu mu‘âyene ve mahallinde vukû‘ı üzre tahrîr ve ba‘dehu meclis-i şer‘a gelip ma‘an irsâl olunan şeyh-i mezbûr ve Mustafa Beşe ile vukû‘u üzre ihbâr ve takrîr etmeleriyle vâkı‘-i hâl bi’l-iltimâs ketb ve terkîm ve yedlerine def‘ ve teslîm olundu fi’l-yevmi’s-sâbi‘ aşer min Zi’l-ka‘deti’ş-şerîfe lisene hamse ve semânîn ve elf.

Fahru’s-sulehâ Salih Çelebi bin eş-Şeyh Hüseyin Efendi / el-Hâcc Ahmed Çelebi bin Mustafa Bey / Hasan Halife bin Davud / Şeyh Mehmed Efendi bin Mustafa / Ali Çelebi bin Abdullah / Halil bin Ahmed

Suret

Mahmiyye-i Konya’da Sarı Hasan mahallesi sâkinlerinden iken bundan akdem vefât eden Veli Bey ibn-i boş) nâm kimesnenin sulbî sagîr oğlu Osman’ın vasîsi olan Abdurrahman Çelebi ibni Murad meclis-i şer‘-i şerîfe gelüp bast-ı merâm ve takrîr-i kelâm idüp bu âna gelince ben sagîr-i merkûm Osman’ın tesviye-i umûruna savb-ı şer‘den mansûb vasîsi olup lakin bana hâlâ özr-i şer‘î ârız olmağla hüsn-i ihtiyârım ile vesâyet-i mezbûreden ferâgat ve nefsimi azl eyledim dedikde sagîr-i mezbûra babası müteveffâ-yı merkûmun muhallefâtından irsen intikâl eden emvâl ve erzâkını zabt ve hıfza vesâir vâkı‘ olan umûr-ı şer‘iyyesini görüvermeye mezbûr Abdurrahman Çelebi yerine bir vasî lâzım ve mühimm olmağın sagîr-i mezbûrun vâlidesi işbu râfi‘atü’l-kitâb Saliha binti Şaban nâm hatun mukaddime ve müstakîme olmağla cânib-i şer‘den vasî nasb ve ta‘yîn olundukda ol dahi vesâyet-i merkûmeyi kabûl ve hıdmet-i lâzımesini edâya ta‘ahhüd ve iltizâm etmeğin mâ vaka‘a bi’t-taleb ketb olundu fi’l-yevmi’s-sâbi‘ aşer min Zi’l-ka‘deti’ş-şerîfe lisene hamse ve semânîn ve elf.

İbrahim Halife bin Mustafa / el-Hâcc Osman bin Hüseyin / el-Hâcc Mustafa bin el-Hâcc Pir Ali

Suret

Mahmiyye-i Konya’da Kürekçi mahallesi mütemekkinelerinden sâhibetü’s-sefer Enise binti Avanos nâm nasraniye meclis-i şer‘-i şerîfde bast-ı merâm ve takrîr-i kelâm edip ben nasraniye olup cemâ‘at-i müslimînden mahalle-i mezbûrede sâkin Satılmış Ahmed bin Abdullah nâm kimesnenin taht-ı nikâhında zevcesi iken mezbûr Satılmış Ahmed tarih-i kitâbdan dört buçuk ay mukaddem fevt olmağla nasara tâifesinden bir kimesneye hâlâ nefsimi tezvîc murâd edip yedimde olan fetvâ-yı şerîfe mûcebince cânib-i şer‘den izn taleb ederin dedikde mahalle-i merkûme ahalisinden İmam Ali Halife ve Seyyid Mehmed Çelebi bin Seyyid Salih ve el-Hâcc Veli bin Mehmed ve Mustafa bin Veli nâm kimesne li ecli’l-ihbâr meclis-i şer‘a hâzırûn olup eserü’l-istihbâr fi’l-vâkı‘ mezbûre Enise binti (boş) bu âna gelince nasrâniyet üzredir İslâm kabûl eylediği mesmû‘umuz değildir zevci olup ehl-i İslâmdan olan mezbûr Satılmış Ahmed tarih-i merkûmda fevt olup hâlâ iddeti münkazıye olmuşdur diyü her biri haber verdiklerinden sonra mezbûrenin ibrâz eylediği fetvâ-yı şerîfenin mazmûn-ı dürer-i bârında bir müslim fevt oldukda zevce-i metrûkesi Hind kâfire ba‘de’l-idde Amr-ı kâfire nefsini tezvîce kâdire olur mu el-cevâb olur deyü buyrulmağın hâkim-i mevki‘-ü’l-kitâb tûbâ lehu ve hüsnü meâb dahi ber mûceb-i fetvâ-yı şerîfe husûs-ı mezbûr içün merkûmeye izn vermeğin mâ vaka‘a bi’t-taleb ketb olundu fi’l-yevmi’s-sâdis aşer min Zi’l-ka‘deti’ş-şerîfe lisen hamse ve semânîn ve elf.

Hamza Çelebi bin Mahmud / Mehmed Dede bin Hasan / Abdullah bin Ali

Suret

Mahmiyye-i Konya’da Alaca Mescid mahallesi sâkinelerinden iken bundan akdem vefât eden Rabia binti Mahmud nam hatunun li-ebeveyn karındaşı oğlu ve hasren vârisi olan Mehmed bin Mehmed nâm kimesne meclis-i şer‘-i hatîr-i lâzımü’t-tevkîrde râfi‘-i hâze’l-kitâb el-Hâcc Mustafa Beşe ibni Beşir mahzarında üzerine da‘vâ ve takrîr-i kelâm edip mahalle-i merkûmede vâkı‘ bir tarafdan Veli Bey mülkü ve bir tarafdan Topçuzâde mülkü ve bir tarafdan tarîk-i hass ve bir tarafdan tarîk-i âmm ile mahdûd bir tabhâne ve bir örtme ve bir izbe ve bir oda harâbesi ve havliyi müştemil menzil mûrisem müteveffât-ı merkûme Rabia’nın mülkü olup ba‘de vefâtihâ irsen bana intikâl etmişdir mezbûr el-Hâcc Mustafa Beşe nâ-hakk vaz‘-ı yed eder hâlâ zabtındadır suâl olunup alıverilmesi matlûbumdur dedikde gibbe’s-suâl mezbûr el-Hâcc Mustafa Beşe cevâbında tarih-i kitâbdan yirmi beş sene mukaddem mezbûr Rabia hâl-i sıhhatinde mülkü olan menzil-i mahdûd-ı merkûmı bana kırk esedî guruşa bâten bey‘ ve teslîm ve yedimden tamâmen kabz-ı semen edip mülk-i müşterâm olmuşdur diyü def‘le mukâbele eyledikde gıbbe’l-istintâk müdde‘î-i merkûm def‘-i meşrûhı bi’l-külliye inkâr idicek mezbûr el-Hâcc Mustafa Beşe’den def‘-i meşrûhuna beyyine taleb olundukda udûl-i müslimînden civar-ı Hazret-i Mevlana mahallesinde sâkin Abdülkerim Çelebi bin el-Hâcc Mehmed ve Mehmed bin el-Hâcc Emrullah nâm kimesneler li ecli’ş-şehâde meclis-i şer‘a hâzırân olup eserü’l-istişhâd fi’l-vâkı‘ tarih-i merkûmda mezbûre Rabia hâl-i sıhhatinde mülkü olan menzil-i mahdûd-ı mezkûrı bizim huzûrumuzda mezbûr el-Hâcc Mustafa Beşe’ye kırk esedî guruşa bâten bey‘ ve teslîm ve yedinden bi’t-tamâm kabz-ı semen eyledi hâlâ menzil-i mahdûd-ı mezkûr merkûm el-Hâcc Mustafa Beşe’nin mülk-i müşterâsıdır biz bu husûsa şâhidleriz şehâdet dahi ederiz diyü şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a olmağın mezbûr Mehmed mu‘ârazadan men‘ birle mâ vaka‘a bi’t-taleb ketb olundu fi’l-yevmi’l-hâmis aşer min Zi’l-ka‘deti’ş-şerîfe lisene hamse ve semânîn ve elf.

Mehmed Halîfe bin İsmail Halife / el-Hâcc Abdüsselam Çelebi bin İvaz Efendi / el-Hâcc Ahmed Çelebi bin Mustafa Bey / Sevindik Beşe bin Mustafa / Ali Çelebi bin Oruç

Suret

Mahmiyye-i Konya’da Seb‘ahân mahallesi sâkinlerinden iken bundan akdem vefât eden el-Hâcc Süleyman bin Memi nâm kimesnenin verâseti zevce-i metrûkeleri Rabia ve İsmihan nâm hatunlar ile sulbî oğulları el-Hâcc Ali ve İbrahim ve Ahmed ve Mustafa ve Hasan ve sulbiye kızları Fati ve Ayişe ve Rahime’ye münhasıra olduğu ilm-i şer‘î ile ma‘lûm oldukdan sonra mezbûre Ayişe meclis-i şer‘-i hatîr-i lâzımü’t-tevkîrde râfi‘ü’l-kitâb merkûm el-Hâcc Ali mahzarında üzerine da‘vâ ve takrîr-i kelâm edip mukaddemâ benim tevellüdüm zamânından üç ay mürûr etdikde babamız merkûm el-Hâcc Süleyman fevt olup muhallefâtından Aşıkan yolu üzerinde vâkı‘ bir tarafı Mesihzâde mülkü ve bir tarafı el-Hâcc Abdurrahman oğlu mülkü ve tarafeynden tarîk-i âmm ile mahdûd iki örtme ve bir havli ve eşcâr ve kürûmı müştemil bir kıt‘a müşâ‘ ve müşterek mülk-i mevrûsumuz olan bağı mezbûr el-Hâcc Ali müstakıllen ahar kimesneye bey‘ ve teslîm ve kabz-ı semen etmeğle semen-i mezbûrdan hisse-i şer‘iyyeme on iki bin akçe isâbet etmişiken otuz seneden berü avk u te’hîr edip vermekde muhâlefet eder suâl olunup alıverilmesi matlûbumdur dedikde gıbbe’s-suâl mezbûr el-Hâcc Ali cevâbında tarih-i kitâbdan otuz altı sene mukaddem mezbûre Ayişe sagîre olmağla gâib-i ani’l-meclis el-Hâcc Hüseyin nâm kimesne savb-ı şer‘den mansûb-ı vasîsi olmağla bağ-ı merkûmı beyne’l-verese taksîm ve merkûme Ayişe’nin hissesini ba‘de’l-kabz âhara bey‘ ve teslîm ve semenini ahz u kabz eyledi ben asla vaz‘-ı yed ve müdâhale etmedim diyücek ba‘de’l-bulûğ özr-i şer‘î yoğiken on beş sene mürûr edip sükûn olunan da‘vânın bilâ emr istimâ‘ı memnû‘ olmağın husûs-ı mezbûr için mâdem ki emr-i şerîf vârid olmadıkça mezbûre Ayişe mu‘ârazadan men‘ birle mâ vaka‘a bi’t-taleb ketb olundu fi’l-yevmi’s-sâdis aşer min Zi’l-ka‘de lisene hamse ve semânîn ve elf.

Fahrü’l-akrân Seyyid Sinan Çelebi bin Seyyid Şahin / Recep Çelebi bin el-Hâcc Abdurrahman / Hamza Çelebi bin Mahmud / Mehmed Dede bin Hasan

Ayişe / bey‘-i bağ / el-Hâcc İvaz

Suret

Mahmiyye-i Konya’da Pürçeklü mahallesi sakinlerinden el-Hâcc İvaz ibni el-Hâcc Mustafa nâm kimesne meclis-i şer‘-i hatîr-i lâzımü’t-tevkîrde işbu râfi‘atü’l-kitâb Ayişe ibneti el-Hâcc Mehmed tarafından tasdîk-i câîye vekîl-i şer‘îsi olan zevci İsmail Beşe ibni Ramazan mahzarında ikrâr-ı tâmm ve takrîr-i kelâm edip mahmiyye-i merkûme zeylinde Sahtiyan Poduk nâm mevzi‘de vâkı‘ bir tarafdan el-Hâcc Mehmed mülkü ve bir tarafdan Muhzır Ahmed mülkü ve tarafeynden tarîk-i âmm ile mahdûd bir bâb beyt ve bir çaraşhâne ve arz-ı hâliye ve eşcâr bağçesini müştemil olup Hazret-i Mevlana Celaleddin kuddise sırruh vakfına beher sene otuz beş akçe icâre-i zemîni olan dokuz tahta bağımı tarih-i kitâbdan sekiz ay mukaddem merkûme Ayişe Hatun’a yüz esedî guruşa bey‘-i bât-ı sahîh-i şer‘î ile bey‘ edip ol dahi semen-i merkûm ile iştirâ ve kabûl eylemeğin meblağ-ı mezbûr yüz guruşu bi’t-tamâm merkûme Ayişe yedinden ahz u kabz eyleyüp teslîm-i mebî‘ eyledim hudûd-ı merkûme dâhilinde olan bağ-ı mezbûr cemî‘ levâhık ve murâfıkı ve tevâbi‘ ve tarâyiki ile hîn-i bey‘den merkûme Ayişe’nin mülk-i müşterâsıdır keyfemâ-yeşâ’ ve yahtâr zabt ve tasarruf eylesin dedikde gıbbe’t-tasdîk mâ vaka‘a bi’t-taleb ketb olundu fi’l-yevmi’r-râbi‘ aşer min Zi’l-ka‘deti’ş-şerîfe lisene hamse ve semânîn ve elf.

Es-Seyyid Abdi Çelebi bin es-Seyyid Cafer / el-Hâcc Mustafa bin el-Hâcc Ahmed / Mustafa Beşe bin Mahmud / Abdülkerim bin Süleyman / Dellal Mahmud bin Veli / İbrahim Beşe bin Ali Bey

Suret

Mahmiyye-i Konya’da Pir Esed mahallesi sâkinlerinden Mustafa bin Ahmed meclis-i şer‘-i hatîr-i lâzımü’t-tevkîrde işbu râfi‘ü’l-kitâb el-Hâcc Mehmed ibni el-Hâcc Halil mahzarında ikrâr ve takrîr-i kelâm edip mahmiyye-i merkûmede Debbağhâne mahallesinde vâkı‘ bir tarafdan mezbûr el-Hâcc Mehmed mülkü ve bir tarafdan Çini Mehmed mülkü ve bir tarafdan Süleyman mülkü ve bir tarafdan tarîk-i âmm ile mahdûd bir tabhâne ve bir sofa ve bir havliyi müştemil menzil mukaddemâ Köse Muharrem ibni Hüseyin nâm kimesnenin mülkü olup ba‘de vefâtihi verâseti zevcesi Fatıma binti Nebi nâm hatunla sulbiye kızları Ayişe ve Ayni ve Ümmi’ye münhasıra olmağla muhallefâtı taksîm olundukda cümlenin rızâsıyla menzil-i mezbûr ba‘de’t-takvîm müstakıllen zevcesi merkûme Fatıma’nın hissesine isâbet edip ve kurbunda vâkı‘ mülk debbâğ dükkânı ale’l-iştirâk kızları merkûmât Ayişe ve Ayni ve Ümmi’nin hisselerine isâbet eyledikden sonra merkûme Fatıma bin yetmiş bir senesi Saferü’l-hayrı evâilinde menzil-i mahdûd-ı merkûmı otuz iki esedî guruşa bana bey‘ ve teslîm ve ba‘de kabzu’s-semen hüccet-i şer‘iyye olunmuşiken mezbûre Ayni dükkân-ı merkûmdan hissesi ve menzil-i mezbûrı ma‘an safka-i vâhide ile mezbûr el-Hâcc Mehmed’in babası el-Hâcc Halil’e hufyeten yedi bin akçeye bey‘ ve teslîm edpi ol dahi ba‘de’l-iştirâ ve’l-kabz ba‘de zamân fevt olmağla menzil-i mezbûr bi’l-irsi’ş-şer‘î oğlu mezkûr el-Hâcc Mehmed’e intikâl etmeğle bey‘-i merkûme vukûfumda tecvîz etmeyip menzil-i mezbûrı merkûm el-Hâcc Mehmed’den da‘vâ sadedinde olduğumda ol dahi menzil-i mezbûr vech-i şer‘î üzre mülk-i müşterâm olduğunu ba‘de’l-inkâr tavassut-ı müslimîn ile da‘vâ-yı meşrûhamdan mezbûr el-Hâcc Mehmed ile on guruşa sulh olup bedel-i sulhu yedinden ba‘de’l-kabz menzil-i mezbûra müte‘allik da‘vâdan mezbûr el-Hâcc Mehmed üzerine vechen mine’l-vücûh da‘vâ ve husûmetim kalmadı min ba‘d zimmeti berîdir husûs-ı mezbûra müte‘allik benden bi’l-asâle ve bi’l-vekâle da‘vâ sudûr eder ise lede’l-hükkâmi’l-kirâm mesmû‘a olmaya dedikden sonra mezbûr Mustafa’nın üveği kızı olan Fatıma binti Ahmed meclis-i mezbûrda mezkûr el-Hâcc Mehmed mahzarında tav‘an ikrâr edip menzil-i mahdûd-ı merkûm ile kurbunda vâkı‘ bir bâb harâbe debbâğ dükkânı müteveffâ-yı mezbûr Muharrem’in muhallefâtından olmamağla hîn-i kısmetde sulbiye kızları işbu vâlidem Ayni ile merkûmetân Ayişe ve Ümmi’nin hisselerine isâbet etmek üzre menzil ve dükkânın sülüs-i şâyi‘ine vâlidem merkûme Ayni mutasarrıfe olup ve sülüsünü mezkûretân Ayişe ve Ümmi mutasarrıfeler iken babam mezbûr Ahmed’e bey‘ ve teslîm ol dahi ba‘de’l-iştirâ ve’t-tesellüm mülkü olduğu halde fevt olup verâseti zevcesi vâlidem merkûme Ayni ile bana ve sagîre kız karındaşım olup babamdan sonra fevt olan Rabia’ya münhasıra olmağın bi’l-irsi’ş-şer‘î üçümüze intikâl etdikde ben sagîre iken vâlidem merkûme Ayni kendi hisselerini asâleten ve benim ve kız karındaşım Rabia’nın vasîlerimiz olmağla zarûret-i nafakamız için mezbûr el-Hâcc Mehmed’in babası el-Hâcc Halil’e vesâyeten bin yetmiş dört senesi Şevvâli’nin yedinci günü bâten semen-i mislinden evfer ve ezyed olan yetmiş esedî guruşa bey‘ ve teslîm ve kabz-ı semen edip hüccet-i şer‘iyye vermeğle ben dahi hâlâ bâliğa olup âgâh olduğumda bey‘-i mezbûrı tecvîz eyledim min ba‘d menzil-i mezbûrda ve dükkân-ı meşrûhda aslâ hakkım yokdur mezkûr el-Hâcc Mehmed’in mülküdür keyfemâ-yeşâ’ mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu fi’l-yevmi’l-hâdî aşer min Zi’l-ka‘deti’ş-şerîfe lisene hamse ve semânîn ve elf.

Fahrü’l-akrân Hasan Beşe serdâr / Ahi Baba el-Hâcc Receb bin İlyas / el-Hâcc Süleyman Beşe bin el-Hâcc Abdi / Fahrü’l-emsâl Süleyman Beşe serdâr-ı sâbık / Hüseyin Beşe / el-Hâcc Mehmed bin Dilaver / Receb Çelebi Pazarbaşı / el-Hâcc Receb bin Mustafa / el-Hâcc Mahmud bin el-Hâcc Mehmed / Ali bin el-Hâcc Bayezid / el-Hâcc İvaz bin el-Hâcc Mehmed

Suret

Mahmiyye-i Konya’da Sarı Hasan mahallesi sâkinlerinden râfi‘ü’l-kitâb Abdurrahman bin Murad nâm kimesne meclis-i şer‘-i hatîr-i lâzımü’t-tevkîrde işbu Musa Beşe ibni el-Hâcc İsmail mahzarında üzerine da‘vâ ve takrîr-i kelâm edip mezbûr Musa Beşe tarih-i kitâbdan bir gün mukaddem ba‘de’l-asr benim menzilime gelip sâbıkâ vasîsi olduğum hâlâ şakirdim olan gâib-i ani’l-meclis İbrahim bin Veli Bey nâm emredi taleb edip muhâlefet eylediğimde bana git diyüp ve avretime şetm edip kapımı kırıp içeri girip seni katl edeyim diyü hançer çıkarıp sol elimin üzerini darb ve mecrûh eylemekle ben dahi zâbitine şikâyete giderken tekrâr ardımca yetişip sell-i seyf üzerime hücûm edip kılıç arkasıyla beni darb eyledi suâl olunsun dedikde gıbbe’s-suâl ve akîbü’l-inkâr ve ba‘de’l-istişhâd udûl-i müslimînden mahalle-i merkûmede sâkin Ömer bin Ali ve civar mahallesinde sâkin el-Hâcc Abdülkadir ibni el-Hâcc Mustafa nâm kimesneler li ecli’ş-şehâde meclis-i şer‘a hâzırân olup eserü’l-istişhâd fi’l-vâkı‘ mezbûr Musa Beşe bizim huzûrumuzda merkûm Abdurrahman’ı kılıç ile darb eyledi biz gördük bu husûsa şâhidleriz şehâdet dahi ederiz diyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a oldukdan sonra mahalle-i mezbûre ahalisinden İmam İbrahim Halife ve Derviş Mevlüd bin Sevindik ve Süleyman bin Süleyman ve el-Hâcc Mustafa bin Musa ve Sefer ibni el-Hâcc Ali ve el-Hâcc Mehmed bin Mahmud ve Halil bin Cafer ve el-Hâcc Abdi ibni Osman ve Ahmed Dede ibni Pir Veli nâm kimesne li ecli’l-ihbâr meclis-i şer‘a hâzırûn olup eserü’l-istihbâr mezbûr Musa Beşe daima şürb-i hamr ve fısk üzredir diyü her biri sû-i hâlini haber virmeğin mûcebiyle ba‘de’l-hükm mâ vaka‘a bi’t-taleb ketb olundu fi’l-yevmi’t-tâsi‘ min Zi’l-ka‘deti’ş-şerîfe lisene hamse ve semânîn ve elf.

Pazarbaşı Receb Çelebi bin el-Hâcc Abdurrahman / el-Hâcc Mehmed bin Mahmud / Osman bin el-Hâcc Mehmed / Halil bin Mustafa

suret

Karahisar-ı sâhib sükkânından Kürd Halil Ağa ibni (boş) nâm kimesne tarafından husûs-ı âti’z-zikre vekâlet iddi‘â eden Abdusselam Efendi ibni İvaz Efendi meclis-i şer‘-i hatîr-i lâzımü’t-tevkîrde işbu Debbağ Şaban Beşe ibni Yakup mahzarında üzerine bi’l-vekâle da‘vâ ve takrîr-i kelâm idüp müvekkilim merkûm Halil Ağa’nın mezbûr Şaban Beşe zimmetinde câriye bahâsından yüz kırk beş esedî guruşu olup mezkûr Şaban Beşe imzâ ve hatmiyle mümzâ ve mahtûm deyn tezkiresi vermeğle hâlâ bi’l-vekâle meblağ-ı mezbûrı taleb ederin suâl olunsun dedikde gıbbe’s-suâl mezbûr Şaban Beşe cevâbında vech-i muharrer üzre cariye bahâsından mezbûr Halil Ağa’ya yüz kırk beş esedî guruş deynim vardır ve ibrâz olunan tezkire benimdir diyü ikrâr ve i‘tirâf edip vekâlet-i mezkûre ma‘lûmum değildir diyü inkâr etmeğin müdde‘î-i mezbûrdan vekâlet-i meşrûhasını mübeyyin beyyine taleb olundukda udûl-i müslimînden Bab-ı Aksaray mahallesinde sâkin el-Hâcc Mehmed ibni el-Hâcc Mehmed ve Maden ibni Abdülcelil nâm kimesneler li ecli’ş-şehâde meclis-i şer‘a hâzırân olup eserü’l-istişhâd fi’l-vâkı‘ mezbûr Halil Ağa bizim huzûrumuzda mezkûr Şaban Beşe zimmetinde olan meblağ-ı merkûm yüz kırk beş guruşu ahz u kabza ve kendüye îsâle mezbûr Abdüsselam Efendi’yi vekîl eyledi ol dahi vekâlet-i merkûmeyi kabûl eyledi biz bu husûsa şâhidleriz şehâdet dahi ederiz diyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâkı‘a olmağın meblağ-ı mezbûrı edâya mezbûr Şaban Beşe’ye tenbîr birle mâ vaka‘a bi’t-taleb ketb olundu fi’l-yevmi’t-tâsi‘ aşer min Şevvâli’l-mükerrem lisene hamse ve semânîn ve elf.

Seyyid Mehmed Çelebi bin Şeyh Bahşayiş Efendi / Halil Beşe bin Karakayış / Hamza Çelebi bin el-Hâcc Mahmud

Suret

Mahmiyye-i Konya’da İbni Kazgan mahallesi sâkinlerinden iken bundan akdem vefât eden el-Hâcc Halil nâm kimesnenin sulbî sagîr oğlu Mehmed’e babası müteveffâ-yı mezbûr el-Hâcc Halil’in ve mukaddemâ vefât eden vâlidesi (boşluk) nâm hatunun muhallefâtlarından irs-i şer‘î ile intikâl eden emvâl ve erzâkını zabt ve hıfza vesâir vâkı‘ olan umûr-ı şer‘iyyesini görüvermeye bir vasî lazım ve mühimm olmağın sagîr-i mezbûrun deyzesi râfi‘atü’l-kitâb Raziye binti İbadullah nâm hatun mukaddime ve müstakime olmağla cânib-i şer‘den vasî nasb ve ta‘yîn olundukda ol dahi vesâyet-i merkûmeyi kabûl ve hıdmet-i lâzımesini edâya ta‘ahhüd ve iltizâm etmeğin mâ vaka‘a bi’t-taleb ketb olundu fi’l-yevmi’s-sânî min Zi’l-ka‘deti’ş-şerîfe lisene hamse ve semânîn ve elf.

Şaban Halife bin el-Hâcc Nasuh / Fahru’l-kuzât Ahmed Efendi bin Durmuş Beşe / Ahmed Çelebi bin Bayram Ağa / Mehmed Bey bin Abdullah / Hüseyin bin Mehmed

suret

Mahmiyye-i Konya’da Sarı Hasan mahallesi sâkinlerinden iken bundan akdem fevt olan Mustafa bin Durak nâm kimesnenin verâseti zevcesi (boşluk) nâm hatunla sulbî oğulları Mevlüd ve Mehmed ve Durak nâm kimesnelere münhasıra olup merkûme hatun menkûlâtdan hissesini ahzla ihrâc olundukdan sonra mezbûrân Mehmed ve Durak dahi müte‘âkiben vefât edip verâsetleri karındaşları merkûm Mevlüd’e münhasıra olduğu şer‘an mütehakkık oldukdan sonra mezbûr Mevlüd meclis-i şer‘-i hatîr-i lâzımü’t-tevkîrde râfi‘ü’l-kitâb Osman bin Musli nâm kimesne mahzarında ikrâr-ı tâmm ve takrîr-i kelâm edip mahalle-i merkûmede vâkı‘ kıbleten ve şarken Fati Hatun mülkü ve şimâlen tarîk-i hâss ve garben tarîk-i âmm ile mahdûd bir oda ve bir tabhâne ve bir harâbe ahurı ve bir harâbe örtme ve havliyi müştemil olup ebniye ve sukûfu mülk ve zemîninin Hazret-i Mevlana Celaleddin kuddise sırruh vakfına beher sene dört akçe icâresi olan menzilin nısf-ı şâyi‘i babam müteveffâ-yı mezbûr Mustafa’nın mülk-i mevrûsı olup ba‘de vefâtihi ber vech-i muharrer üzre bana intikâl edip mülk-i mevrûsum olmağla mezbûr Osman’a on iki buçuk esedî guruşa bey‘-i bât-ı sahîh-i şer‘î ile bey‘ idüp ol dahi semen-i merkûm ile iştirâ ve kabûl eylemeğin meblağ-ı merkûmdan on guruşa mezbûr Osman yedinden bir re’s kır bargir ve âlâtı mükemmel bir eyer alıp kabûl edip ve iki buçuk guruşunu dahi merkûm Osman yedinden nakden ahz u kabz eyleyip teslîm-i mebî‘eyledim ba‘de’l-yevm menzil-i mahdûd-ı merkûmun müştemilâtı ile nısf-ı şâyi‘i mezbûr Osman’ın mülk-i müşterâsıdır keyfemâ-yeşâ’ ve yahtâr zabt ve tasarruf eylesin dedikde gıbbe’t-tasdîk mâ vaka‘a bi’t-taleb ketb olundu fi’l-yevmi’s-sânî min Zi’l-ka‘deti’ş-şerîfe lisene hamse ve semânîn ve elf.

İbrahim Halife bin Mustafa / Abdurrahman Beşe bin Mevlüd / Halil bin el-Hâcc İsmail / Abdülkadir bin Mevlüd Dede / Musa Beşe bin el-Hâcc İsmail / el-Hâcc Abdi bin Osman

Suret

Mahmiyye-i Konya’da vâkı‘ merhûm ve mağfûrun leh Sultân Alaaddin câmi‘-i şerîfi evkâfına berât-ı âlî ile hâlâ mütevellî olan el-Hâcc Ahmed bin Mustafa Bey meclis-i şer‘-i hatîr-i lâzımü’t-tevkîrde evkâf-ı merkûme kurâsından Sille nâm karyede sâkin cemâ‘at-i müslimînden Receb ve Osman ibni Hasan ve Hüseyin Beşe ibni Abdullah ve Mestan bin Himmet nâm kimesneler ve zimmiyân tâifesinden Esteraşhos veledi Mihayil ve Mikayil veledi Fota ve Mavri veledi Ayvad nâm zimmîler vesâirleri muvâcehelerinde üzerlerine da‘vâ ve takrîr-i kelâm edip karye-i merkûme üzerinde mukaddemâ avârızhânesi mukayyed iken cennet-mekân-ı firdevs-âşiyân fatih-i Bağdad Murad Hân-ı Gâzî aleyhi’r-rahmetü ve’l-gufrân hazretleri zikr olunan avârızhânesi ref‘ ve karye-i merkûmeyi avârız ve nüzülden mu‘âf edip hâne mukâbelesi bedel-i hamr ve ziyâde cizye nâmıyla câmi‘-i mezbûrun evkâf-ı hamse hüddâmına senede yirmi bin akçe vaz‘ ve ta‘yîn edip bu âna gelince meblağ-ı mezbûrun altı ayda on bin akçesini karye-i mezbûre zimmîleri edâ edip ve sene tamâmında kezalik altı ayda on bin akçeyi sükkân-ı karye-i mezbûreden olan müslimîn ve zimmîler ma‘an vakfa edâ ve teslîm edegelmişler iken hâlâ meblağ-ı mezbûr on bin akçeden hissselerini müslümânlar vermekde te‘annüt ederler suâl olunup ke’l-evvel alıverilmesi matlûbumdur diyü emr-i âlî ibrâz edip feth ve ahali-i karye-i mezbûrede muvâcehelerinde kırâat olundukdan sonra karye-i merkûme zimmîleri istintâk olundukda cevâblarında meblağ-ı mezbûrı minvâl-i meşrûh üzre vakfa edâ edegeldiklerine tav‘an i‘tirâf eylediklerinden sonra karye-i mezbûreden müslimîn dahi istintâk olunduklarında cevâblarında karye-i merkûmenin avârızhânesini sultân-ı mûmâ ileyh hazretleri meccânen mu‘âf edip meblağ-ı mezbûr yirmi bin akçe ahali-i karye-i mezbûre an aslin zimmîler olmağla on bin akçesini ziyâde-i cizye diyü ahz olunagelmişidi ba‘de zamân dedelerimiz ve babalarımız ve biz şeref-i İslâmla müşerref olduğumuzdan sonra yine mütevellî-i vakf olanlar bizden bedel-i hamr ve ziyâde-i cizye taleb etmeleriyle mahmiye-i mezbûrede bin seksen üç senesinde hilâfeten mütevellî olan Mevlânâ Şükrüllah Efendi huzûrunda mütevellî-i vakf-ı mezbûr muvâcehesinde karye-i merkûme zimmîleriyle murâfa‘a-i şer‘-i şerîf olduğumuzda mevlânâ-yı mûmâ ileyh mütevellî-i vakf-ı mezbûrı ve zimmîleri da‘vâ-yı meşrûhalarından men‘ ve yedimize hüccet-i şer‘iyye vermişdir diyü tarih-i merkûm ile müverraha ve mevlânâ-yı mûmâ ileyhin imzâsıyla mümzâten hüccet-i şer‘iyye ibrâz ve feth ve kırâat olundukda mazmûnı takrîr-i meşrûhlarına mutâbık olduğundan mâ‘adâ mütevellî-i mezbûr yedinde olan emr-i âlîde dahi meblağ-ı merkûm yirmi bin akçe bedel-i hamr ve ziyâde-i cizye mukâbelesinde vaz‘ olunduğu musarrah olup avârız ve bedel-i nüzül mukâbelesinde vaz‘ olunduğuna işâret ve tasrîh olmamağın karye-i mezbûre müslümânlarına bedel-i hamr ve ziyâde-i cizye akçesi lâzım gelmediği ecilden meblağ-ı merkûm tamâmen karye-i merkûme zimmîlerine lâzım gelmeğle zimmî tâifesine meblağ-ı merkûmı vakf için mütevellî-i vakfa edâya ba‘de’t-tenbîh mütevellî-i mezbûr el-Hâcc Ahmed da‘vâ-yı meşrûhasından men‘ birle mâ vaka‘a bi’t-taleb ketb olundu fi’l-yevmi’t-tâsi‘ ve’l-işrîn min Şevvâli’l-mükerrem lisene hamse ve semânîn ve elf.

Seyyid Mustafa Çelebi bin Seyyid Yusuf / Yakup Halife bin Süleyman / Külahcı Mehmed bin Ahmed / Yusuf Halife bin Hamza

Mütevellî el-Hâcc Ahmed / Keşf-i tabhâne-i Sultân Selim

Suret

Mahmiyye-i Konya’da vâkı‘ merhûm ve mağfûrun leh Sultân Selim Hân aleyhi’r-rahmetü ve’l-gufrân hazretleri evkâfına hâlâ mütevellî olan el-Hâcc Ahmed Çelebi ibni Mustafa Bey meclis-i şer‘-i şerîfe gelip takrîr-i kelâm edip mahmiye-i merkûmede Hazret-i Mevlânâ Celaleddin kuddise sırruh zâviyesi kurbunda vâkıf-ı mûmâ ileyh hazretleri binâ eylediği tabhâne hânı dimeğle ma‘rûf hânın fevkânî örtmesi ve fevkânî odalarının pencere kapıları ve taş trabzon ve bazı divarları ve matbah önünde olan odalarının tarası ve harem kapusı ve matbah içi ve çeşmeden matbaha gelince suyolu künkleri harâba müşrif olmağla savb-ı şer‘den üzerine varılıp muhammen ile ma‘an ta‘mîre muhtâc olan mevâzı‘a nazar olunup ne mikdâr akçe ile meremmet olunduğunu tahmîn edip ve mâl-ı vakfla termîme izn taleb ederin dedikde hâkim-i mevki‘ü’l-kitâb tûbâ lehu ve hüsnü meâb hazretleri dahi bizzat hân-ı merkûma varıp mahmiyye-i merkûmede mi‘mârbaşı olan el-Hâcc Osman ve zeyl-i kitâbda isimleri mestûr olan bî-garaz müslimîn ile mevâzi‘-i mezbûreye nazar ve müşâhede olundukda fi’l-vâkı‘ harâba müşrif olup ta‘mîr ve termîme muhtâc olduğu mütehakkık olmağla zikr olunan fevkânî örtmenin kurşundan mâ‘adâsının meremmetine kırk yedi esedî guruş ve fevkânî odaların pencere kapılarına üç guruş ve taş trabzon ve köşe ta‘mîrine iki guruş ve divarların termîm ve derzleri ta‘mîr için kırk guruş ve matbah içine ve önünde olan odaların tarasına elli iki guruş ve suyolu künklerine beş guruş ki cem‘an yüz kırk dokuz guruş tahmîn ve takrîr eylediklerinden sonra vakf-ı mezbûr mâlından zikr olunan meremmât için yüz kırk dokuz guruşu harc u sarfa mütevellî-i mezbûra izn birle mâ vaka‘a bi’t-taleb ketb olundu fi’l-yevmi’t-tâsi‘ ve’l-işrîn min Cumade’l-ula lisene hamse ve semânîn ve elf.

Fahru’l-hutebâ Hüseyin Efendi / Fahru’s-sülehâ Salih Çelebi bin Şeyh Hüseyin Efendi / Fahru’l-akrân Abdurrahman Bey bin Abdi / İftihârü’l-emsal Süleyman Beşe serdâr-ı sâbık

Mütevellî el-Hâcc Ahmed / Keşf-i dâru’ş-şifâ

Suret

Mahmiyye-i Konya’da vâkı‘ merhûm ve mağfûrun leh Sultan Alaaddin tâbe serâhu hazretleri binâ ve vakf eylediği dâru’ş-şifâ evkâfının hâlâ mütevellîsi olan el-Hâcc Ahmed bin Mustafa Bey meclis-i şer‘-i şerîfe gelip takrîr-i kelâm ve bast-ı merâm edip zikr olunan dâru’ş-şifânın içeri kubbesinin ve orta kubbenin dâhilinde ve hâricinde sıvası kalmayıp ve kıble cânibinde vâkı‘ divarı dipleri çelavik ve taş kapı etrâfı harâba müşrif olup ta‘mîr ve termîme muhtâc olmağla cânib-i şer‘den üzerine varılıp ehl-i vukûf muhammen ile ta‘mîre muhtâc olan mevâzı‘a nazar ve ne mikdâr akçe ile termîm olunduğu tahmîn ve mâl-ı vakfla meremmete izn olunmak taleb ederin dedikde bi’l-fi‘il bâb niyâbeti hıdmetinde olan umdetü’n-nüvvâb ve’l-müteşerri‘în Hüseyin Efendi ta‘yîn ve irsâl olunup ol dahi mahmiyye-i merkûmede mi‘mârbaşı olan el-Hâcc Osman ve zeyl-i kitâbda muharreretü’l-esâmî olan ehl-i vukûf bî-garaz müslimîn ile sâlifü’z-zikr dâru’ş-şifâya varıp mevâzi‘-i mezbûreye nazar olundukda mevâzi‘-i merkûmenin termîmi için kireç ve kamış ve sıva ve üstâdiye vesâir mesârif-i mühimmesine on sekiz esedî guruş tahmîn-i sahîh ile tahmîn eylediklerini mevlânâ-yı mezbûr mahallinde tahrîr ve ba‘dehu ma‘an irsâl olunan mi‘mârbaşı-i merkûm el-Hâcc Osman’la meclis-i şer‘a gelip alâ vukû‘ihi ihbâr ve takrîr etmeğin vakf-ı mezbûr mâlından meblağ-ı mezkûru mevâzi‘-i merkûme meremmetine harc u sarfa mütevellî-i mezbûra izn birle mâ vaka‘a bi’t-taleb ketb olundu fi’l-yevmi’t-tâsi‘ ve’l-işrîn min Cumade’l-ula lisene hamse ve semânîn ve elf.

Molla Mustafa bin Mehmed Çelebi / Kara Mustafa natûr / Ahmed tâbi‘-i Bektaşzâde

Suret

Mahmiyye-i Konya sâkinlerinden iken bundan akdem vefât eden Halil bin Ali nâm kimesnenin li-ebb karındaşı ve inhisâr üzre vârisi olan Mustafa nâm sagîrin savb-ı şer‘den mansûb-ı vasîsi olan Ali bin Halil nâm kimesne meclis-i şer‘-i hatîr-i lâzımü’t-tevkîrde râfi‘ü’l-kitâb el-Hâcc Veli bin Mahmud nâm kimesne mahzarında bi’l-vesâye ikrâr ve takrîr-i kelâm edip sagîre-i mezbûr Mustafa’nın postalcılar sûkında bir tarafdan el-Hâcc Ahmed dükkânı ve bir tarafdan el-Hâcc Sübhanverdi dükkânı ve bir tarafdan (boşluk) ve bir tarafdan sûk-ı merkûm ile mahdûd olup müteveffâ-yı mezbûr Halil’den müntakil müstakıllen mülk-i mevrûsı olan bir bâb dükkânı sagîr-i mezbûrun zarûret-i nafaka ve kisvesi için mezbûr el-Hâcc Veli’ye yevm-i vukû‘-ı ba‘îde semen-i misli olan yüz on esedî guruşa bey‘-i bât-ı sahîh-i şer‘î ile bey‘ edip ol dahi semen-i merkûm ile iştirâ ve kabûl eylemeğin meblağ-ı mezbûr yüz on esedî guruşu merkûm el-Hâcc Veli yedinden bi’t-tamam ahz u kabz eyleyip teslîm-i mebî‘ eyledim ba‘de’l-yevm mülk-i müşterâsıdır keyfemâ-yeşâ’ ve yahtâr zabt ve tasarruf eylesin dedikde gıbbe’t-tasdîk mâ vaka‘a bi’t-taleb ketb olundu fi’l-yevmi’s-sânî min Zi’l-ka‘deti’ş-şerîfe lisene hamse ve semânîn ve elf.

Fahru’l-hutebâ Abdülkadir Efendi ibni Mahmud Efendi / es-Seyyid Süleyman Çelebi bin es-Seyyid Ahmed / Mustafa Beşe bin Mehmed / İbrahim bin Ebubekir / Ebubekir Çelebi bin el-Hâcc Mehmed / Hüseyin bin Derviş İbrahim / Süleyman bin Murad

Suret

Mahmiyye-i Konya muzâfâtından Sahra nahiyesine tâbi‘ Rumdigin nâm karye sâkinlerinden Hasan Beşe bin İshak nâm kimesne meclis-i şer‘-i hatîr-i lâzımü’t-tevkîrde râfi‘ü’l-kitâb Hüseyin Beşe ibni Abdülgani mahzarında ikrâr ve takrîr-i kelâm edip karye-i merkûmede vâkı‘ etraf-ı erba‘adan tarîk-i âmm ile mahdûd iki tabhâne ve iki oda ve bir çardak ve iki ahur ve bir samanlık ve bir havliyi müştemil mülk menzilimi ve tahmînen on iki vakıyye bir kazgan ve dört vakıyye bir leğen ve bir yan kaliçesi ve üç re’s öküz ve üç re’s ineğimi ve zikri âtî olan araziden beynimizde ma‘lûm yirmi dönüm tarlada mezrû‘ olan mahsûlümü mezbûr Hüseyin Beşe’ye safka-i vâhidede kırk esedî guruşa bey‘-i bât-ı sahîh-i şer‘î ile bey‘ edip ol dahi semen-i merkûm ile iştirâ ve kabûl eylemeğin meblağ-ı mezbûru bi’t-tamâm merkûm Hüseyin Beşe yedinden ahz u kabz eyleyip teslîm-i mebî‘ eyledim ba‘de’l-yevm sâlifü’z-zikr menzil ve eşyâ ve devvâb mülk-i müşterâsıdır zabt ve tasarruf eylesin ve bu âna gelince benim taht-ı tasarrufumda olup karye-i merkûme kurbunda bir tarafdan İbrahim ve bir tarafdan Derviş Çelebi ve bir tarafdan Sevindik tarlaları ve bir tarafdan tarîk-i âmm ile mahdûd on dönüm suğla tarlamı ve yine bir tarafdan Muharrem ve bir tarafdan Sevindik ve bir tarafdan Abdi ve bir tarafdan Ömer tarlaları ile mahdûd dört dönüm tarlamı ve Karkın nâm karyeye mürûr eden tarîk-i âmm üzerinde vâkı‘ bir tarafdan Köse Sefer ve bir tarafdan Kocaoğlan ve bir tarafdan Mehmed Ağa tarlaları ve bir tarafdan tarîk-i mezbûr ile mahdûd on altı dönüm tarlamı ve yine tarîk-i merkûm kurbunda vâkı‘ tarafeynden Sefer ve bir tarafdan Safa ve bir tarafdan Mehmed tarlaları ile mahdûd sipahi timarından dört dönüm tarlamı ve yine karye-i merkûme tarîk kurbunda bir tarafdan Süleyman ve bir tarafdan Derviş Çelebi ve bir tarafdan Mehmed tarlaları ve bir tarafdan tarîk-i merkûm ile mahdûd on dönüm tarlamı ve Dedeler mezra‘ası kurbunda vâkı‘ tarafeynden Sevindik ve bir tarafdan Süleyman tarlaları ve bir tarafdan tarîk-i merkûm ile mahdûd on beş dönüm tarlamı ve karye-i Alemdar kurbunda vâkı‘ bir tarafdan Abdülkadir ve bir tarafdan Sevindik tarlaları ve bir tarafdan arz-ı hâliye ve bir tarafdan tarîk-i âmm ile mahdûd dört dönüm suğla tarlalarımı mezbûr Hüseyin Beşe’ye sâhib-i arz ma‘rifetleriyle ferâgat ve hakk-ı tasarrufumu tefvîz eyledim ol dahi tefevvüz ve kabûl eylemekle yedinden mukâbele-i tefvîzde onbeş esedî guruş ahz u kabz eyledim min ba‘d arazi-i merkûmeyi mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu fî gurre-i Zi’l-ka‘deti’ş-şerîfe lisene hamse ve semânîn ve elf.

El-Hâcc Süleyman bin Abdi Beşe / el-Hâcc Ali bin Cuma / Receb bin Osman / Dilaver Bey bin Cafer / Sefer Beşe bin Abdullah / el-Hâcc Veli / Abdi Beşe bin Üveys / Kadri Beşe bin Mustafa / Mehmed Beşe bin Hasan

Suret

Mahmiyye-i Konya’da Seb‘ahân mahallesi sâkinlerinden iken bundan akdem vefât eden Ali bin Süleyman nâm kimesnenin verâseti zevcesi Kerime binti Mustafa nâm hatunla sulbî oğlu Ahmed’e münhasıra olup ba‘dehu merkûme Kerime dahi vefât edip verâseti zevci Mehmed bin Ahmed ile sadrı kebîr oğlu mezbûr Ahmed ve sagîr oğulları Abdullah ve İbrahim’e münhasıra olduğu ilm-i şer‘î ile ma‘lûm oldukdan sonra mezbûr Ahmed meclis-i şer‘-i hatîr-i lâzımü’t-tevkîrde râfi‘ü’l-kitâb kendi tarafından asîl ve sagîrân-ı merkûmân Abdullah ve İbrahim’in babaları olup velîleri ve savb-ı şer‘den mansûb-ı vasîleri olan mezkûr Mehmed mahzarında ikrâr-ı tâmm ve takrîr-i kelâm edip mukaddemâ babam Ali vefât eyledikde defter-i kassâm mûcebince muhallefâtından esedî guruş yüz yirmişer akçeye râyic iken on altı bin altı yüz akçelik cinsi ve levni ma‘lûm menkulât ile mahalle-i mezbûrede vâkı‘ lede’l-ahali ve’l-cîrân ma‘lûmu’l-hudûd olan menzil benim hisse-i şer‘iyyeme isâbet edip ben sagîr olmam ile vâlidem merkûme Kerime savb-ı şer‘den bana vasî nasb olunup menzil vesâir eşyâmı kabz ve kendi eşyâsına halt edip ben bâliğ olduğumdan sonra dahi bana teslîm etmeyip zabtında iken hâlâ vefât etmeğle cümle muhallefâtına vâzı‘ü’l-yed olduğu cihetden mezbûr Mehmed’den hâlâ menzil ve eşyâmı taleb ve da‘vâ sadedinde olduğumda ol dahi mukaddemâ vâliden merkûme Kerime senin için cânib-i şer‘den nafaka ve kisve bahâ takdîr etdirip hüccet-i şer‘iyye olunmuşdur diyü bir kıt‘a nafaka hücceti ibrâz edip ve baban mezbûr Ali zimmetinde merkûme Kerime’nin mehr-i müecceli bâkî kalmışdır diyüp benden taleb ve da‘vâ sadedinde olmağla bi-tavassutu’l-müslimîn alâ tarîkü’s-sulh zikr olunan on altı bin altı yüz akçelik eşyâm ve menzilime müte‘allika da‘vâm mukâbelesinde mezbûr Mehmed asâleten ve vesâyeten ve velâyeten ber mûceb-i hüccet-i şer‘iyye takdîr olunan nafaka ve kisve bahâ ve mehr-i müeccele müte‘allika da‘vâsından fâriğ olup ve nakd kırk esedî guruşla mahalle-i merkûmede vâkı‘ bir tarafdan mezbûr Mehmed mülkü ve bir tarafdan Mirza mülkü ve bir tarafdan tarîk-i hass ve bir tarafdan tarîk-i âmm ile mahdûd menzilden bir fevkânî oda ve bir tahtânî tabhâne ve bir havliyi müştemil menzili bana verip teslîm etmeğle ben dahi vech-i meşrûh üzre meblağ-ı merkûm kırk guruşa menzili alıp kabûl ve kabz edip da‘vâ-yı meşrûhamdan ferâgat ve mezbûrûn Mehmed ve Abdullah ve İbrahim’in zimmetlerini ibrâ-i âmm-ı kâtı‘ü’l-hısâm ile ibrâ ve iskât eyledim ve hâlâ vâlidem müteveffât-ı merkûme Kerime’nin muhallefâtından dahi ber mûceb-i defter hisse-i şer‘iyyeme yirmi iki guruş isâbet etmeğle mezbûr Mehmed Halife yedinden bi’t-tamâm ahz u kabz eyledim min ba‘d müteveffâ babam Ali’nin ve ba‘dehu vefât eden vâlidem merkûme Kerime’nin metrukâtından hisselerime aid bir akçe ve bir habbe hakk ve alâkam kalmadı ba‘de’l-yevm bu husûslara müte‘allika bir tarîkle benden bizzat veya bi’l-vekâle da‘vâ ve husûmet sudûr eder ise lede’l-hükkâm istimâ‘ olunmaya dedikde mezbûr Mehmed dahi ba‘de’t-tasdîk menzil-i mezbûre ve kırk guruşa ve mehr-i müeccele ve nafakaya müte‘allik mezkûr Ahmed ile da‘vâ ve nizâ‘ım yokdur deyip ahadühümâ âharın zimmetini ibrâ etmeğin mâ vaka‘a bi’t-taleb ketb olundu fi’l-yevmi’l-âşir min Şevvâli’l-mükerrem lisene hamse ve semânîn ve elf.

Mehmed Halife bin İsa Hâce / Süleyman Halife bin Musa / Mustafa Çelebi bin el-Hâcc Mehmed / Hasan Çelebi bin Sıddık / el-Hâcc Mehmed bin Receb / Ahmed Çelebi bin el-Hâcc Ali / Ali Çelebi bin Yunus

Suret

Mahmiyye-i Konya’da Çirkab mahallesi sâkinlerinden râfi‘ü’l-kitâb Ahmed Beşe ibni Derviş nâm kimesne meclis-i şer‘-i hatîr-i lâzımü’t-tevkîrde işbu el-Hâcc Mehmed bin Mustafa mahzarında üzerine da‘vâ ve takrîr-i kelâm edip tarih-i kitâbdan otuz gün mukaddem mezbûr el-Hâcc Mehmed bana hırsız ve gidi yosma ve ırgad diyü şetm eyledi suâl olunup icrâ-yı şer‘ olunması matlûbumdur dedikde gıbbe’s-suâl ve akîbü’l-inkâr ve ba‘de’l-istişhâd udûl-i müslimînden Mehmed bin Bali ve Mustafa bin Mahmud nâm kimesneler li ecli’ş-şehâde meclis-i şer‘a hâzırân olup eserü’l-istişhâd fi’l-vâkı‘ tarih-i kitâbdan otuz gün mukaddem bizim huzûrumuzda mezbur el-Hâcc Mehmed hırsız ve gidi yosma ve ırgad diyü edâ-i şehâdet mezkûr Ahmed Beşe’ye şetm eyledi biz bu husûsa şâhidleriz şehâdet dahi ederiz diyü edâ-i şehâdet-i şer‘iyye eylediklerinde ba‘de’t-ta‘dîl şehâdetleri hayyiz-i kabûlde vâkı‘a olmağın mûcebiyle ba‘de’l-hükm mâ vaka‘a bi’t-taleb ketb olundu fi’l-yevmi’s-sânî min Zi’l-ka‘deti’ş-şerîfe lisene hamse ve semânîn ve elf.

Sefer Beşe bin Mürsel / Nebi bin Mustafa / Ahmed bin Ahmed

Suret

Mahmiyye-i Konya sâkinlerinden iken bundan akdem vefât eden Abdülbaki Çelebi ibni Şeyh Bahşayiş Efendi’nin verâseti zevcât-ı metrûkeleri Sabire binti Mehmed ve Mihri binti Hasan ve Fatıma binti İsmail nâm hatunlar ile li-ebb karındaşları Seyyid Mehmed Çelebi ve el-Hâcc Şaban ve Şeyh Osman ve Fakih Dede ve Piresed ve li ebb kız karındaşı Rahime’ye münhasıra olduğu ilm-i şer‘î ile ma‘lûm oldukdan sonra mezbûrân Seyyid Mehmed Çelebi ve el-Hâcc Şaban asâleten ve merkûmûn Şeyh Osman ve Fakih Dede ve Piresed ve Rahime ve Sabire ve Mihri ve Fatıma taraflarından bey‘-i âti’l-beyânı ve kabz-ı semeni ikrâra vekîl-i şer‘îleri olmalarıyla vekâleten meclis-i şer‘-i hatîr-i lâzımü’t-tevkîrde râfi‘ü’l-kitâb Mehmed Bey bin Hasan mahzarında her biri ikrâr ve takrîr-i kelâm edip mûrisimiz müteveffâ-yı mezbûr Abdülbaki Çelebi’nin düyûn-ı müsbitesinin edâsına muhallefâtından menkûlâtı vefâ etmeyip bi’z-zarûre akârını bey‘ lâzım gelmeğle bundan esbak ma‘rifet-i şer‘le Çirkab mahallesinde vâkı‘ bir tarafdan Ahmed Ağa mülkü ve bir tarafdan Mustafa mülkü ve bir tarafdan tarîk-i hass ve bir tarafdan arz-ı hâliye ile mahdûd bir sofa ve bir tabhâne ve iki oda ve bir yazlık ve bir ahur ve havliyi müştemil mülk menzili sûk-ı sultânîde ba‘de’l-müzâyede ve inkıtâ‘u’r-rağbe elli sekiz esedî guruşda karâr edip meblağ-ı mezbûr menzil-i merkûmun vakt-i ukdede semen-i misli olnağın zarûret-i deyn için mezbûr Mehmed Bey’e elli sekiz guruşa bey‘-i bât-ı sahîh-i şer‘î ile bey‘ edip ol dahi semen-i merkûm ile iştirâ ve kabûl eylemeğin meblağ-ı merkûm elli sekiz guruşu bi’t-tamam mezkûr Mehmed Bey yedinden ahz u kabz eyleyüp teslîm-i mebî‘ eyledik ba‘de’l-yevm menzil-i mahdûd-ı merkûm cemî‘ tevâbi‘ ve hukûkuyla mezkûr Mehmed Bey’in mülk-i müşterâsıdır keyfemâ-yeşâ’ ve yahtâr zabt ve tasarruf eylesin dediklerinde gıbbe’t-tasdîk mâ vaka‘a bi’t-taleb ketb olundu fi’l-yevmi’s-sânî min Zi’l-ka‘deti’ş-şerîfe lisene hamse ve semânîn ve elf.

Fahrü’l-kuzât Ahmed Efendi bin Durmuş Beşe / Ahmed Ağa bin Mehmed / Ömer Bey bin Osman Bey / Ahmed Çelebi bin Bayram Ağa / Hüseyin Halife bin Hamza / Monla Hüseyin bin Mustafa / Hüseyin Çelebi bin Ahmed / Mahmud bin Mehmed / Abdülhalim Çelebi bin Mehmed

Suret

Mahmiyye-i Konya’da Ahmed Fakih mahallesi sâkinlerinden Muharrem Bey ibni Ahmed Bey ve meclis-i şer‘-i hatîr-i lâzımü’t-tevkîrde râfi‘ü’l-kitâb kıdvetü’l-emâsil ve’l-akrân Ahmed Ağa ibni Ali mahzarında ikrâr ve takrîr-i kelâm edip mahalle-i merkûmede vâkı‘ kıbleten el-Hâcc Receb mülkü ve şarken ve şimâlen mezbûr Ahmed Ağa mülkü ve garben tarîk-i âmm ile mahdûd bir tabhâne ve bir ahûr ve bir mikdâr havlîyi müştemil mülk menzilimi mûmâ ileyh Ahmed Ağa’ya elli beş esedî guruşa bey‘-i bât-ı sahîh-i şer‘î ile bey‘ edip ol dahi semen-i merkûm ile iştirâ ve kabûl eylemeğin meblağ-ı merkûm elli beş guruşu bi’t-tamam mûmâ ileyh Ahmed Ağa yedinden ahz u kabz eyleyip teslîm-i mebî‘ eyledim ba‘de’l-yevm menzil-i merkûm cemî‘ tevâbi‘ ve hukûkuyla mezkûr Ahmed Ağa’nın mülk-i müşterâsıdır keyfemâ-yeşâ’ ve yahtâr zabt ve tasarruf eylesin dedikde gıbbe’t-tasdîk mâ vaka‘a bi’t-taleb ketb olundu fi’l-yevmi’s-sânî min Zi’l-ka‘deti’ş-şerîfe lisene hamse ve semânîn ve elf.

Hatib es-Seyyid Mustafa Efendi bin Ahmed Efendi / Bektaş bin Hasan / Mahmud Çelebi bin el-Hâcc Mehmed / Ramazan Çelebi bin Mahmud / Ali Çelebi bin Mehmed Ağa / el-Hâcc Şaban bin Receb / el-Hâcc Halil bin Receb / el-Hâcc Ahmed bin İskender / Mehmed Çelebi bin Ahmed / Ali Beşe bin Mahmud

Ahmed Ağa / bey‘-i menzil 240 guruş

Suret

Mahmiyye-i Konya’da Ahmed Fakih mahallesi sâkinlerinden olup bundan akdem vefât eden Mahmud bin Abdi Bey nâm kimesnenin verâseti zevce-i menkûhası Safiyye nâm hatun ile sulbi kebîr oğulları Ali Beşe ve Mehmed ve Mustafa ve İsmail ve Abdi nâm kimesnelere ve sulbiye kızları Fati ve Raziye nâm hatunlara münhasıra olup zevcesi merkûme Safiyye Hatun alâ tarîkü’t-tehârüc hissesini ahzla ihrâc olundukdan sonra tereke-i müteveffâ-yı mezbûr on iki sehm i‘tibâr olunup sihâm-ı merkûmeden ikişer sehmi sulbî oğullarına ve birer sehmi sulbiye kızlarına isâbet etdiği şer‘an mütehakkık olmağla merkûmân Mehmed ve Mustafa asâleten ve merkûm Ali Beşe kendi kablinden asâleten ve karındaşları merkûmân İsmail ve Abdi tarafından bey‘-i âti’l-beyâna ve kabz-ı semene iddi‘â-yı vekâlet etmekle vekâleten ve merkûme Fati tarafından iddi‘â-yı vekâlet eden zevci Ömer Beşe bin el-Hâcc Mehmed vekâleten ve mezbure Raziye tarafından kezalik iddi‘â-yı vekâlet eden dayısı Sinan Bey ibni Bestan vekâleten meclis-i şer‘-i hatîr-i lâzımü’t-tevkîrde râfi‘-i haze’l-kitâb fahrü’l-emâsil ve’l-akrân Ahmed Ağa ibni Ali mahzarında her biri ikrâr ve i‘tirâf edip mahalle-i merkûmede vâkı‘ şarken el-Hâcc Asiye nâm hatun mülkü ve şimâlen bazen Ali Halife mülkü ve bazen Süleyman Dede mülkü ve bazen Abdülhalim mülkü ve garben tarîk-i âmm ve kıbleten bazen el-Hâcc Receb ve bazen Muharrem mülkleri ile mahdûd olup bir sofayı ve iki odayı ve bir tabhâneyi ve bir ahurı ve havliyi müştemil mülk menzil ve yine âna muttasıl olup bir mikdar arsa-i hâliyeyi ve eşcâr-ı müsmire ve gayr-ı müsmireyi müştemil altı tahta mülk bağ mûrisimiz ve babamız müteveffâ-yı mezbûrun ile’l-vefât mülkü olup ba‘de vefâtihi irs-i şer‘le veresesi mezbûrûna intikâl edip zevcesi merkûme sümün hisse-i şer‘iyyesini terike-i uhrâdan ahz u kabz etmeğle mülkeyn-i mezbûreyn vech-i meşrûh üzre silk-i mülkümüzde ve taht-ı yedimizde olmağla mûmâ ileyh Ahmed Ağa’ya tarafeynden îcâb ve kabûlü hâvî bey‘-i bât-ı sahîh-i şer‘î ile iki yüz kırk esedî guruşa safka-i vâhide ile bey‘ edip ol dahi iştirâ ve kabûl eylemeğin meblağ-ı mezbûr iki yüz kırk esedî guruşu mûmâ ileyh Ahmed Ağa yedinden bi’t-tamâm ahz u kabz eyleyip teslîm-i mebî‘ eyledik min ba‘d menzil-i mezbûr ve bağ-ı merkûm mülk-i müşterâsıdır keyfemâ-yeşâ’ ve yahtâr zabt ve tasarruf eylesin dediklerinde mezbûr Ahmed Ağa dahi makrûn-ı merkûmûnı cemî‘ kelimât-ı meşruhalarında ba‘de’t-tahkîk vükelâ-yı mezbûrûn Ali Beşe ve Ömer Beşe ve Sinan Bey müvekkilleri merkûmûn İsmail ve Abdi ve Fati ve Razıye taraflarından vücûh-ı muharrere üzre vekâletleri ma‘lûmum olmamağla menzil-i mezbûr ve bağ-ı merkûmdan müvekkillerinin hisselerini iştirâdan rücû‘ ve semeninden hisselerini istirdâd matlûbumdur diyü vekâletlerini inkâr idicek vükelâ-yı mezbûrûndan vekâlet-i mezkûrelerini mübeyyin beyyine taleb olundukda udûl-i müslimînden Bali Bey ibni Bestan ve mezbûr Mehmed li ecli’ş-şehâde meclis-i şer‘a hâzırân olup eserü’l-istişhâd fi’l-vâkı‘ bizim huzûrumuzda mezbûrân İsmail ve Abdi mezbûr Ali Beşe’yi mülkeyn-i mezbûreynden hisselerini bey‘a ve semeninden hisselerini kabza vekîl nasb edip ol dahi vekâlet-i mezbûreyi kabûl eylemişdir bu husûsa bu vech üzre şâhidleriz şehâdet dahi ederiz diyü edâ-i şehâdet-i şer‘iyye eylediklerinden sonra kezalik udûl-i müslimînden Receb Beşe ibni Abdi ve mezbûr Ali Beşe ve Hatib Seyyid Mustafa Efendi ibni Ahmed Efendi ve Mahmud Çelebi ibni el-Hâcc Mehmed nâm kimesne li ecli’ş-şehâde meclis-i şer‘a hâzırûn olup ba‘de’l-istişhâd mezbûrân Receb Beşe ve Ali Beşe fi’l-hakîka bizim huzurumuzda merkûme Fati vech-i muharrer üzre hissesini bey‘a ve kabz-ı semene zevci mezbûr Ömer Beşe’yi vekîl edip ve merkûmân Seyyid Mustafa Efendi ve Mahmud Çelebi dahi fi’l-vâkı‘ bizim huzûrumuzda mezbûre Raziye vech-i meşrûh üzre hissesini bey‘a ve kabz-ı semene dayısı mezkûr Sinan Bey’i vekîl eyledikde mezbûrân dahi vekâlet-i merkûmeyi kabûl etmişlerdir biz bu husûslara şâhidleriz şehâdet dahi ederiz diye her biri edâ-i şehâdet-i şer‘iyye eylediklerinde şuhûd-ı mezkûreynden her biri ta‘dîl ve tezkiye olunup şehâdetleri hayyiz-i kabûlde vâkı‘a olmağın hâkim-i mevki‘ü’l-kitâb tûbâ lehu ve hüsnü meâb mezbûrûnun sıhhat-i vekâletlerine hükm birle mâ vaka‘a bi’t-taleb ketb olundu fi’l-yevmi’s-sânî min Zi’l-ka‘deti’ş-şerîfe lisene hamse ve semânîn ve elf.

Ali Çelebi bin Mehmed Ağa / Ramazan Çelebi bin Mahmud / el-Hâcc Şaban bin Receb / el-Hâcc Halil bin Receb / el-Hâcc Ahmed Beşe bin İskender / Mehmed Çelebi bin Ahmed / Bektaş bin Hasan

İbadullah Efendi / bey‘-i menzil / Saime

Suret

Mahmiyye-i Konya’da Şemseddin-i Tebrizî kuddise sırruh mahallesi sâkinelerinden Saime binti Mustafa nâm hatun tarafından bey‘-i âti’l-beyânı ve kabz-ı semeni ikrâra vekîl olup merkûmeyi ma‘rifet-i şer‘iyye ile ârifân olan Derviş Ali bin İsa ve İvaz bin Ahmed şehâdetleriyle şer‘an vekâleti sâbite olan sadrı oğlu İbrahim bin Halil Ağa meclis-i şer‘-i hatîr-i lâzımü’t-tevkîrde râfi‘ü’l-kitâb fahrü’l-müderrisîni’l-kirâm İbadullah Efendi ibnü’l-merhûm Abdülhalim Efendi mahzarında bi’l-vekâle ikrâr ve takrîr-i kelâm edip müvekkilem vâlidem merkûme Saime ve mahalle-i merkûmede vâkı‘ kıbleten İbrahim Çelebi mülkü ve garben ve şimâlen mûmâ ileyh İbadullah Efendi mülkü ve şarken tarîk-i hâss ile mahdûd bir tabhâne ve bir ahur ve havliyi müştemil mülk menzilini mûmâ ileyh İbadullah Efendi’ye otuz dokuz buçuk guruşa bey‘-i bât-ı sahîh-i şer‘î ile bey‘ edip ol dahi semen-i merkûm ile iştirâ ve kabûl eylemeğin meblağ-ı merkûm otuz dokuz buçuk guruşu mûmâ ileyh yedinden bi’t-tamam ahz u kabz eyleyip teslîm-i mebî‘ eyledi ba‘de’l-yevm mülk-i müşterâsıdır keyfemâ-yeşâ’ ve yahtâr zabt ve tasarruf eylesin dedi dedikde gıbbe’t-tasdîk mâ vaka‘a bi’t-taleb ketb olundu. Fî 9 Zi’l-ka‘de sene 1085

Umdetü’l-a‘yân İsbat Ağa / Ahmed Ahve / Fahrü’l-meşâyih Mehmed Efendi bin Emrullah Efendi / Hüdaverdi Bey bin Mustafa / Fahrü’l-hutebâ Abdülkadir Efendi bin Mahmud Efendi

Suret

Mahmiyye-i Konya’da Abdülvahid mahallesi sâkinlerinden Mahmud ve Ali ibni Ahmed Beşe ve İbrahim Çelebi bin Mehmed nâm kimesneler asâleten ve Ayişe binti Ahmed nâm hatun tarafından bey‘-i ati’l-beyânı ve kabz-ı semeni ikrâra vekîl olup merkûmeyi ma‘rifet-i şer‘iyye ile ârifân olan Yusuf Halife ibni Hamza ve Mehmed bin Ahmed şehâdetleriyle şer‘an vekâleti sâbite olan zevci Hüseyin bin Yusuf vekâleten meclis-i şer‘-i hatîr-i lâzımü’t-tevkîrde râfi‘ü’l-kitâb Yakup Halife ibni Süleyman mahzarında her biri ikrâr ve takrîr-i kelâm edip mahalle-i merkûmede vâkı‘ kıbleten İbrahim mülkü ve şarken Hüseyin mülkü ve şimâlen ve garben tarîk-i âmm ile mahdûd bir sofa ve bir tabhâne ve bir oda ve bir ahur ve bir örtme ve havliyi müştemil olup müşâ‘ ve müşterek mülkümüzü mezbûr Yakup Halife’ye yüz buçuk esedî guruşa bey‘-i bât-ı sahîh-i şer‘î ile bey‘ edip ol dahi semen-i merkûm ile iştirâ ve kabûl eylemeğin meblağ-ı mezbûrdan on beş guruşa bir re’s doru iğdiş bargirini ve nakd seksen beş buçuk esedî guruşa mezbûr Yakup Halife yedinden bi’t-tamam ahz u kabz eyleyip teslîm-i mebî‘ eyledik ba‘de’l-yevm mülk-i müşterâsıdır keyfemâ-yeşâ’ ve yahtâr zabt ve tasarruf eylesin dediklerinde gıbbe’t-tasdîk mâ vaka‘a bi’t-taleb ketb olundu fi’l-yevmi’s-sâmin ve’l-işrîn min Şevvâli’l-mükerrem lisene hamse ve semânîn ve elf.

Kıdvetü’l-kuzât Mahmud Efendi bin Hasan / Fahrü’l-meşâyıh Mehmed Efendi bin Emrullah Efendi / Seyyid Osman Çelebi bin el-Hâcc Abdi / Ahmed Halife bin el-Hâcc Ömer / Hüsam Çelebi bin Ahmed / Süleyman bin Mustafa Beşe / Mehmed Çelebi bin Süleyman / Abdullah Çelebi bin Hüseyin / İbrahim bin Ali / Mustafa bin el-Hâcc Piri

Suret

Mahmiyye-i Konya’da Fakih Dede mahallesi sâkinlerinden iken bundan akdem vefât eden merhûm Mustafa Efendi ibni Abdülkerim Efendi’nin verâseti Fatıma binti Rıdvan Ağa ve sulbiye sagîre kızı Eşmi ve li ebeveyn karındaşı fahru’l-müderrisîn Abdülkerim Efendi’ye münhasıra olup merkûme Fatıma Hatun mukaddemâ alâ tarîkü’t-tehârüc ihrâc olunduğu ilm-i şer‘î ile ma‘lûm oldukdan sonra mûmâ ileyh Abdülkerim Efendi asâleten ve sagîre-i mezbûre Eşmi’nin savb-ı şer‘den mansûb-ı vasîsi olmağla vesâyeten meclis-i şer‘-i hatîr-i lâzımü’t-tevkîrde râfi‘ü’l-kitâb Abdi Halife ibni Ömer mahzarında ikrâr ve takrîr-i kelâm edip müteveffâ-yı mezbûr Mustafa Efendi’nin düyûn-ı müsbitesinin edâsına menkûlâtından vefâ eder şeyi olmayıp akârını bey‘ lâzım gelmeğle mahalle-i mezbûrda vâkı‘ bir tarafdan Sefer mülkü ve bir tarafdan bazen Sefer mülkü ve bazen Satı Baba mülkü ve bir tarafdan tarîk ile mahdûd bir mikdar havliyi müştemil bir bâb develik harâbesini tarih-i kitâbdan dört sene mukaddem semen-i misli olan otuz esedî guruşa zarûret-i deyn için mezbûr Abdi Halife’ye bey‘-i bât-ı sahîh-i şer‘î ile bey‘ edip ol dahi semen-i merkûm ile iştirâ ve kabûl eylemeğin meblağ-ı mezbûr otuz guruşu bi’t-tamâm mezkûr Abdi Halife yedinden ahz ve kabz eyleyip teslîm-i mebî‘ eyledim hîn-i akdden mülk-i müşterâsıdır keyfemâ-yeşâ’ ve yahtâr zabt ve tasarruf eylesin dedikde gıbbe’t-tasdîk mâ vaka‘a bi’t-taleb ketb olundu fi’l-yevmi’s-sâbi‘ ve’l-işrîn min Şevvâl lisene hamse ve semânîn ve elf.

Satı bin Abdi Halife / el-Hâcc İvaz bin el-Hâcc Şaban / Sefer bin Aydın / el-Hâcc Ahmed bin İsa / Nebi bin Sübhanverdi / el-Hâcc Osman bin Mimarbaşı